நம் குடியரசுக்கு வந்த வியாதிகள்..

நம் தேசம் சுதந்திரமடைந்து, புதிய அரசியலமைப்பு சட்டத்தை கைக்கொண்ட நினைவு தினம் நம் குடியரசு தினம். இந்த நாளில் நமது தேசத்தின் முன்னேற்றத்தினை தடுத்துக்கொண்டிருக்கும் சில பிரச்சினைகளை பற்றிய எனது அனுமானத்தை முன் வைக்கிறேன்..

தனிமனித ஒழுக்கமும், கடமை உணர்வும், நேர்மையும், சத்தியமும் அபாயமான அளவுக்கு குறைந்துபோனது.

மக்களிடையே குறைந்துவரும் சமூக பொறுப்பும், அதிகரிக்கும் வடிகட்டிய சுயநல சிந்தனைகளும்.

பணம் பிரதானமாகவும், மனிதம் கடைசியாகவும் கருத்தப்படும் ஒரு வாழ்வியலை கைக்கொள்ளும் ஒரு தலைமுறை உருவெடுத்தது.

அதிகரித்துவரும் குடி/போதைப்பழக்கமும், அதுதான் நாகரீகம் என இளைய சமுதாயம் தீவிரமாக நம்புவதும்.

சிதைந்துவரும் விவசாயத்தை அடியோடு புறக்கணிக்கும் அரசாங்கம்.

அரசாங்கத்தில் மலிந்துவிட்ட லஞ்சமும் ஊழலும்.

அதிகரிக்கும் விலைவாசியும், உயரும் வறுமையும்.

சட்டங்கள் சரியான முறையில், எல்லோருக்கும் சமமாக அமல் படுத்தப்படாதது. வலுத்தவனுக்கு ஒருவிதமாகவும், இளைத்தவனுக்கு ஒருவிதமாகவும் அமலாகும் சட்டங்களும் அதை அமல்படுத்துபவர்களும்.

சட்டங்களில் இவ்வளவு ஓட்டைகள் இருப்பது தெரிந்தும் அதை அடைக்க யாரும் பெரிய அளவில் முயற்சி செய்யாதது. மற்றும் புதிய சட்டங்கள் செய்யும்போதும் பொத்தல்களுடனேயே செய்ய  முனைவது.

கடவுளே, மஹாலிங்கம், நினைக்கையிலேயே கண்ணைக் கட்டுதே.. ஏதாவது செஞ்சு நம்ம தேசத்து மக்களை காப்பாத்துங்க..

சதுரகிரி நாயகனே சரணம்.. சரணம்..

சமூக அவலங்களும், கர்ம வினைகளும், ஞானிகளும்

நம் வாழ்வில் ஏற்படும் பலவிதமான பிரச்சினைகளுக்கான மூல காரணம் நம் கர்ம வினைகளின்பால் உள்ளது. அதுபோல நம் சமூகத்தில் நிலவும் பலவித பிரச்சினைகளுக்கான காரணமும் இந்த கர்ம வினைகளை சார்ந்தே இருக்க முடியும். பல தனிமனிதர்களின் கர்ம வினைகள்தான் ஒரு சமூகத்தில் பிரதிபலிக்கின்றன.

கர்ம வினை எனப்படுவது என்ன? இதற்கு பல விளக்கங்கள் இருந்தாலும், நான் எளிதில் புரிந்துகொண்டிருக்கும் சில விளக்கங்கள் கீழே

நாம் செய்யும் நல்ல / கெட்ட செயல்களால் நமக்குள் / அதனால் பாதிப்படைபவருக்குள் உருவாகும் எண்ண அலைகளின் பாதிப்புதான்.

ஒருவித எதிர்பார்ப்போடு செய்யப்படும் / செயல்படும் வினைகளின் விளைவு சிந்தனை மூலம் வெளிப்படும். இந்த சிந்தனைகளின் பாதிப்புதான் கர்ம வினை.

எந்த ஒரு செயலும் நல்லது அல்லது கெட்டது என்று வகைப்படுத்த நம் சிந்தனையில் அந்த செயல் ஏற்படுத்தும் பாதிப்பே முக்கிய காரணம். ஒரு விசயத்தை நாம் மனதளவில் எடுத்துக்கொள்ளும் / ஏற்றுக்கொள்ளும் விதம்(பக்குவம்)தான், அதனால் நாம் பாதிப்படைகிறோமா இல்லையா என்பதை தீர்மானிக்கும்.

பாதிப்படைந்தால் கர்ம வினை நிச்சயம். பாதிப்படையாமல் இருக்க பழகிக்கொள்ளவே பல ஆன்மீக சாதனைகள் உதவுகின்றன.


சுருக்கமாக சொன்னால் இந்த கர்ம வினை என்பதும் ஒருவித‌ சக்திதான்.  எனவே The law of conservation of energy இங்கும் பொருந்தும்.

The law of conservation of energy states that energy may neither be created nor destroyed. Therefore the sum of all the energies in the system is a constant.

அதாவது இந்த உலகின் கர்ம வினை என்பது ஒரே நிலையில் இருக்கும். இதை அழிக்க முடியுமா என்பது கேள்விக்குறியதாகினும், இதை நிச்சயம் வேறு திசைகளில் திருப்பிவிட முடியும் என்பது புலனாகிறது.

மனிதர்களுக்கிடையில் இந்த கர்ம வினைகளை அந்த சக்தி நிலையிலேயே மாற்றிக் கொள்ளும் வல்லமை நிச்சயம் இருக்கும். அதை சில ஞானிகள் உபயோகப்படுத்தியும் இருக்கிறார்கள்.

இதுபோல் சமூகத்தில் இருக்கும் கர்ம வினைகளை அந்த சக்தி நிலையிலேயே மாற்றும் வல்லமை இருக்கும் ஞானிகள் இருக்கிறார்களா என தெரியவில்லை. அப்படி இருந்தால் அவர்கள் இதற்குள் ஏதாவது செய்து சமூக அவலங்களை தடுத்திருப்பார்கள்.

அதனால் அப்படி யாரும் இதுவரை இல்லை என்றே நினைக்கிறேன். அப்படிப்பட்டவர்கள் விரைவில் உருவாக வேண்டும். அவர்களால் இந்த சமூகத்துக்கும் அதில் ஏற்பட்டிருக்கும் பிரச்சினைகளுக்கும் ஒரு நல்ல தீர்வு ஏற்பட வேண்டும்.

கடவுளே மஹாலிங்கம் சிறந்த ஞானிகள் நாட்டில் தோன்றி சமூகத்தின் கர்ம வினைகளை சீர்படுத்தி மக்கள் சுபிட்சமாக வாழ அருள் செய்யுங்க..

சதுரகிரியாரே சரணம்.. சுந்தர மஹாலிங்கத்துக்கு அரோஹரா..

மிரட்டும் விலைவாசி உயர்வு...

போனவாரம் நம் அரசு, டீசல், மண்ணெண்ணெய், சமையல் எரிவாயு சிலிண்டர் விலைகளை கணிசமாக உயர்த்தியது.  இதன் விளைவாக அனைத்து பொருள்களின் விலையும் 20 முதல் 30 சதம் வரை குறைந்த பட்சமாக உயரும். வீட்டு வாடகை,  ஆட்டோ கட்டணம், பஸ் கட்டணம், ரயில் கட்டணம் அனைத்தும் உயர்த்தப்படும். இவ்வாறு ஏறும் விலைவாசிகளுக்குத் தகுந்தாற்போல் நம் வருமானம் உயர்வதில்லை. இதனால் இவற்றின் பொருளாதார தாக்கம் நம் நடுத்தர குடும்பங்களில் மிக பயங்கரமாக எதிரொலிக்க ஆரம்பிக்கிறது.

நான் சென்னையில் திருமணமான புதிதில் (2005)  வீடு பார்த்து குடி போன பொழுது வாடகை ரூ 3500-00. அதே வீட்டில் இப்போது (2011) இருக்கும் எனது தாயாரும் சகோதரரும் ரூ15000-00 தருகின்றனர். இதற்கு ரூ 25000-00 கொடுத்து குடிவர பலர் தயாராக இருக்கின்றனர்.  இது கடந்த 6 ஆண்டுகளில் ஏற்பட்ட விபரீத வளர்ச்சி.  (ஏதோ, ஹவுஸ் ஓனர் நல்ல விதமானவர் என்பதால் இன்னும் எங்களை காலி பண்ண சொல்லி தொந்தரவு செய்வதில்லை.)

முன்பு என் வருமானத்தில் 5ல் ஒரு பங்கு வாடகைக்கு கொடுத்துக் கொண்டிருந்தேன். இன்று என் சகோதரர் தன்  வருமானத்தில் முக்கால் பகுதியை வாடகைக்கே கொடுக்கும் நிலை இருக்கிறது.

இது வெறும் வாடகை மட்டுமே.. மற்ற செலவுகளும் வருமானத்திற்கு சம்பந்தம் இல்லாமல் கிடு கிடு என உயர்ந்து நிற்கின்றன. நடுத்தர மக்கள் விழி பிதுங்கி நிற்கின்றனர்.

என்ன செய்வது??? ஒன்றும் புரியவில்லை... சிக்கனமாக இருக்கும் நிலை மாற்றி நாம் கஞ்சத்தனமாக இருந்தால் கூட நிலைமையை சமாளிக்க முடியாது போல இருக்கிறது.

அரசாங்கம் தான் ஏதாவது செய்யணும். என்ன பண்றது அவங்களுக்கு ஊழலை ஒளிக்கவும், அதைப் பற்றி பேசரவங்களை அடக்கவும், மேலும் யாரும் அதப்பத்தி பேசாம இருக்க விலைவாசியை உயர்த்தி அவர்களின் பொருளாதார முதுகெலும்பை உடைப்பதிலும் பிசியாக இருக்கிறார்கள்.

கேவலம். இது ஜனநாயக ஆட்சி என்று சொல்லிக் கொள்ளவே வெட்கமாக இருக்கிறது. இங்கு மோசடி அரசியல் தொழில் செய்யும் அனைவரும் வெட்கி வேதனைப்பட வேண்டிய சூழல் வரணும். அப்பதான் இதுக்கு ஏதாவது ஒரு விடிவுகாலம் பிறக்கும்.

இதுல மனுசன நம்பி பிரயோசனமே இல்லைங்கற பாடத்தை இந்த அரசியல் வாதிகள் சொல்லிக் கொடுத்திட்டாங்க. கடவுள்தான் காப்பாத்தணும்.

கடவுளே மஹாலிங்கம், எங்களையும் நாட்டு மக்களையும் நீங்கதான் காப்பாத்தணும்.

சதுரகிரியாரே சரணம். சுந்தர மஹாலிங்கத்துக்கு அரோஹரா!!!!

யார் இங்கு உத்தமர்...

நம் நாட்டில் இன்றைய சூழலில் ஒருவர் உத்தமராய் வாழ்வது எவ்வளவு கடினம் என்பதை யோசிக்கும்போது புரிகிறது.

இங்கு பெரும்பாலானோர் ஏதாவது ஒரு விதத்தில் லஞ்சம் கொடுக்க வேண்டி இருக்கிறது. உதாரணமாக : டிரைவிங் லைசன்ஸ் எடுக்க,  ரேசன் கார்டு வாங்க / மாற்ற, ஒரு பத்திரம் பதிவு செய்ய, ஒரு கம்யூனிட்டி சர்ட்டிபிகேட் வாங்க, ஒரு பிறப்பு இறப்பு சான்றிதழ் வாங்க, ஒரு ரயில் பர்த் ரிசர்வேசன் வாங்க, போக்குவரத்து விதி மீறலுக்காக,  வீடு கட்ட அனுமதி வாங்க, வேலை வாய்ப்பகத்துல நம்பர் வாங்க, இப்பிடிப் பல..

அதேமாதிரி பெரும்பாலானவர்களுக்கான நேர்மை சில சின்ன விசயங்கள்ல தவறி விடுகிறது. உதாரணமாக  வரிசையில் நிக்கும்போது முன்னே போவது, சில தவறான தகவல் தந்து சலுகைகள் வாங்கிக்கறது, பொது இடங்களில் அசிங்கம் பண்ணுவது, பொது இடங்களில் கிடைக்கும் பொருளை தானே வச்சுக்கிறது, இப்பிடி சில...

இந்த வலைல நாம் நம்மை அறியாமலே சிக்கிக் கொண்டிருக்கிறோம். எல்லோரும் செய்கிறார்கள் அதனால் நாமும் செய்வோம் என்று செய்து கொண்டிருக்கிறோம்.

நிர்வாணிகள் வாழும் ஊரில் உடை அணிந்தவன் பைத்தியக் காரன் என்பது போல இப்படிப்பட்ட சூழலில் ஒருவன் இந்த ஜோதியில் ஐக்கியமாகாமல் இருந்தால் அவனை நிச்சயம் பைத்தியம் என்றுதான் சொல்வார்கள்.

எனவே நம் மக்களில் பெரும்பாலோனோர்  இங்கு ஏதாவது ஒரு விதத்தில் ஊழல் வாதிகளே.. இன்னும் சுருக்கமாக சொன்னால் நாம்  10 ரூபாய் கொள்ளையில் பங்காளிகள் ஊழல் அரசியல்வாதிகளும் அதிகாரிகளும் பல கோடி ரூபாய் ஊழலில் பங்காளிகள். அவ்வளவே.

இது நம் அரசியல்வாதிகளுக்கு ரொம்ப வசதியாக போய் விட்டது. யாராவது அவர்களை எதிர்ப்பதுபோல தோன்றினாலே இதுபோன்ற சில பழய விசயங்களை கிளரி அவர்களின் நம்பகத்தன்மையை கேள்விக் குறியாக்குவதில் இவர்கள் வல்லவர்கள்.

ஒரு அழுக்கான அரசாங்க அமைப்பை உருவாக்கி திட்ட மிட்டு மக்களை அதனுடன் உறவாட விட்டு அவர்களையும் அழுக்காக்கி, ஒரு சமூகத்தையே கெடுத்த பெருமை நம் அரசியல் தலைவர்களை சேரும்.

நம் நாட்டில் பிக் பாக்கெட் காரனுக்கு அடி உதையும், கோடிகளில் கொள்ளை அடிப்பவனுக்கு சலாமும் கிடைக்கும். இதை பற்றி எதுவும் செய்யாமல் இருக்கும் இந்த அரசாங்கம் எதுக்கு? கூட்டுக் கொள்ளையில் மேலும் பலரை இழுத்துவிடவா??

நம் தேசத்தின் மீது உண்மையான அக்கரை கொண்ட யாருக்கும் இதைப் பற்றி நினைக்கும் போது ரத்தம் கொதிக்கும்.

இதுக்கு என்னதான் வழி??? என்றாவது இது முடியுமா??? நமக்கு விமோசனம் உண்டா??

என்னால கீழ்க் கண்ட வழிகளைத்தான் நினைக்க முடியுது :

1) இருக்கிற அனைத்து ஊழல் கட்சிகளும், அரசியல்வாதிகளும், அதிகாரிகளும் திருந்தி தம் சொத்துக்களை நாட்டுடைமையாக்கி உண்மையான் சேவையை, நல்லாட்சியை தருவது. இதுக்கு சாத்தியம் ரொம்ப குறைவு ன்னாலும் இதுதான் மிக சுலபமான தீர்வு.

2) நம் ராணுவம் நாட்டை ஆட்சி செய்வது. ஒரு தேசப்பற்றுள்ள ராணுவ வீரன் இதை சுத்தம் செய்வது. எல்லாருக்கும் கொஞ்ச நாள் கஷ்டமாத்தான் இருக்கும். போகப்போக பழகீரும். குறைந்தது ஒரு 10 வருடம் இந்த தண்டனை நம் தேசத்துக்கு / ஜனநாயகத்துக்கு தேவை.

3) ஒரு ஊழிப் பிரளயம் மாதிரி வந்து நம் தேசத்தின் / உலகத்தின் வரை படமே மாறிப் போறது. இது ரொம்ப கஷ்டம். இதில் தப்பிச்சவங்களுக்கு அதுக்கப்புறம் ஒவ்வொரு வினாடியும் / நாளும் நரகத்துல இருக்குற மாதிரி இருக்கும். இது நடக்காம இருந்தா நல்லது.

இதன் வரிசை சுலபத்திலிருந்து கடினமானது வரை இருக்கிறது.. ஆனால் இவற்றிற்கான சாத்தியங்கள் வரிசை கீழிருந்து மேலாக இருப்பதுதான் கசப்பான உண்மை.

கடவுளே மஹாலிங்கம் !! இந்த மோசமான நிலையில் இருந்து என் தேசத்தையும் மக்களையும் நீங்கதான் பத்திரமா கரை சேர்க்கணும்.

சதுரகிரி சுந்தர மஹாலிங்கமே போற்றி!!!

தேவை ஒரு சமுதாய எழுச்சி....

நம் தேசத்தில் நிலவும் ஆட்சி முறையின் லட்சணம் பற்றியும், லஞ்ச ஊழல்கள் பற்றியும் ஒரு சில மாதங்களாக ஊடகங்களில் பரபரப்பாக இருந்தது. கிரிக்கெட் உலகக் கோப்பை  வந்ததும் அது கொஞ்சம் அடங்கி இருந்தது. இப்போது மீண்டும் திரு அன்னா ஹசாரே புண்ணியத்தில் பரபரப்பாகி இருக்கிறது.

தேசிய அளவில் பிரபலமாக உள்ள ஒவ்வொருவரும் இந்த செய்தியை நம் நாட்டின் அனைத்து மூலைகளுக்கும் கொண்டு சென்று சேர்க்க வேண்டிய கடமை இருக்கிறது.

திரு அன்னா ஹசாரே ஏற்படுத்திக் கொடுத்திருக்கும் இந்த அரிய சந்தர்ப்பத்தை அருமையாகப் பயன்படுத்தி நம் தேசத்தில் ஒரு சமூக எழுச்சி ஏற்படுத்த அனைத்து பிரபலங்களும் உதவ வேண்டும்.

அப்போதுதான் ஒரு எகிப்தில், ஒரு டுனீசியாவில் ஏற்பட்டது போன்ற ஒரு மாற்றம் நம் தேசத்துக்கும் வர ஒரு வாய்ப்பு ஏற்படும்.

சில இந்தி சினிமா நட்சத்திரங்கள் முன் வந்து இதற்கு ஆதரவு தெரிவித்திருந்தாலும், இன்னும் பல பகுதிகளிலிருந்து ஆதரவு இல்லை.

முக்கியமாக, நம் தமிழக பிரபலங்களிடையே இதுபற்றிய பெரிய தாக்கம் இல்லாதது மிக வருத்தமாக இருக்கிறது.

தமிழக ஊடகங்களிலும் இது பற்றிய செய்தியை நமது தேர்தல் செய்திகள் அமுக்கிவிட்டன. தேசிய ஊடகங்களில்தான் இதுபற்றிய செய்திகள் பரபரப்பாக இருக்கின்றன.

ஆனால் இந்தப் பரபரப்புகள் எல்லாம், அடுத்து IPL கிரிக்கெட் வரும் வரைதான். அதன்பிறகு நமது ஊடகங்களின் தேசபக்தியும், நாட்டுப் பற்றும், IPL ல் ஏறிவிடும்.

எனக்கு ஒரு விசயம் இன்னும் புரியவில்லை. நமது கிரிக்கெட் ஹீரோக்களுக்கு ஒரு சமூக ஆர்வமும் இல்லையா? இவ்வளவு பெரிய பிரச்சினை நாட்டில் வெடித்துக்கொண்டு இருக்கும்பொழுது இவர்கள் அது பற்றி ஒரு கருத்தும் சொல்லாமல், தம் பங்களிப்பை செலுத்தாமல் IPL  விளையாடத் தயாராகிக் கொண்டிருக்கிறார்கள்.

இதைக்கூட செய்ய முன்வராத நமது கிரிக்கெட் நட்சத்திரங்களின் நாட்டுப் பற்று சந்தேகத்திற்கு இடமாகிறது. ஒருவேளை நம் கிரிக்கெட் வாரியம் அவர்களை மிரட்டி வைத்திருக்கிறதோ என்ற சந்தேகமும் எழுகிறது.

நமக்கு இப்போது உடனடித் தேவை ஒரு சமுதாய எழுச்சி. அது ஓரளவுக்கு ஆரம்பிக்கும்பொழுது அதைத் தூக்கி நிறுத்த ஒவ்வொரு பிரபலமும் உதவ வேண்டும்.

செய்வார்களா???

மஹாலிங்கம்,  நம் நாட்டில் விரைவில் ஒரு சமுதாய எழுச்சி ஏற்பட்டு ஒரு மறுமலர்ச்சிக்கு வித்திட நீங்கதான் அருள் செய்யணும்.

சதுரகிரி சுந்தர மஹாலிங்கமே சரணம்!!!!!

மீண்டும் இலவசங்கள்....

இலவசங்கள் பற்றிய முந்தய பதிவு :

இலவசங்கள் - தேவையா? என்ன குடுக்கலாம் (!) (?)

சென்ற சட்டமன்றத்தேர்தலில் தேர்தல் அறிக்கைகள் தான் கதாநாயகியாக செயல்பட்டன. ஏனெனில் அவற்றில் ஏராளமான இலவசத் திட்டங்களும், சில மக்கள் நல(??) கவர்ச்சித் திட்டங்களும் இருந்தன. இப்போது 2011 தேர்தலிலும், இலவசங்கள் முன்னிருத்தப்படுகின்றன. முன்பு டிவி, இப்போது கிரைண்டர், மிக்சி, லேப்டாப், அரிசி என்று பட்டியல் நீள்கிறது. மாற்றுக் கட்சியினரின் தேர்தல் அறிக்கையில் வேறு என்ன இலவசங்கள் அறிவிக்கப்படும் என்ற பரபரப்பு நிலவுவதை தடுக்க முடியவில்லை.

நாய்க்கு எலும்புத்துண்டு வீசுவது போல, மக்களுக்கு இந்த இலவசங்கள் தருவதாக அறிவிக்கப்பட்டிருக்கின்றன. மக்களுக்கு கடைசியில் திருவோடும், பிச்சை எடுக்க அரசு அலுவலகங்களுமே மிஞ்சும் என்று தோன்றுகிறது.

யாருமே இது நமது வரிப்பணம் என்று சிந்திப்பது இல்லை. உண்மையில் வருமான வரிக் கட்டுபவர்கள் தான் வரிக் கட்டுகிறார்கள் என்று எண்ணுகிறார்கள். நாம் வாங்கும் அனைத்துப் பொருள்களுக்கும் வரி கட்டப்பட்டிருக்கிறது..

அன்றாடம் உபயோகப்படும், சோப்பு, துணிமணிகள், மற்றும் பல அன்றாட உபயோகப்பொருள் அனைத்துக்கும் அரசு வரி விதிக்கிறது. அதில் வரும் வரி வருமானத்தைக் கொண்டுதான் இந்த இலவசத் திட்டங்கள் அறிவிக்கப்படுகின்றன.

மேலும் மக்களை நிரந்தரக் குடிகாரர்களாக ஆக்கி, அதில் வரும் வருமானமும் அதற்கு உபயோகப்படுத்தப்படுகிறது.

இங்கு யாருக்கும் யோசிப்பதற்கு அவகாசமில்லை. ”கொடுத்தால் வாங்கிக் கொள்ளுங்கள். பிறகு இதுவும் கிடைக்காது.” என்ற மனோபாவமே மேலோங்கி இருக்கிறது.

பொதுமக்கள் சிந்தனையில் இப்போது, நமது அரசியல்வாதிகளையும் அதிகாரிகளையும் பற்றி கீழ்க்கண்ட சிந்தனையே பொதுவாக இருக்கிறது :

1) நமக்குத் தேவையானபோது இவர்கள் உதவுவதில்லை

2) நமக்குத் தேவையானவற்றை இவர்கள் செய்யப்போவதில்லை.

3) இவர்கள் இஷ்டம்போல பொது சொத்துகளை கொள்ளை அடிக்கிறார்கள்.

4) இவர்கள் இஷ்டம்போல ஊழல் செய்து சொத்து சேர்க்கிறார்கள்.

5) இவ்வாறு செய்வது அவர்களின் பிறப்புரிமை. இவ்வாறு செய்யாதவர்கள் / செய்யத் தெரியாதவர்கள் - பிழைக்கத் தெரியாதவர்கள்.

6) இவர்களிடம் இருந்து, நமக்கு சந்தர்ப்பம் வரும்போது, நாமும் முடிந்த அளவு பிடுங்கிக்கொள்ளவேண்டும்.

இந்த மனநிலையில்தான், மக்கள் வோட்டுப் போட பணம் வாங்குவதும், இல்வசங்களுக்காக ஓட்டுப் போடுவதும் நடக்கிறது.

இந்தத் தேர்தலிலும் நாம் (பதிவர்கள், சமூக ஆர்வலர்கள்,  பத்திரிக்கையாளர்கள், சிந்தனையாளர்கள்) எவ்வளவுதான் கூவினாலும் மக்கள் தீர்ப்பு, யார் அதிக இலவசங்கள் தருவார்கள் என்பதைப் பொறுத்தே இருக்கும்போலத்தான் தெரிகிறது.

என்ன செய்வது, கடைசியில், நம் அரசியல்வாதிகளும், அதிகாரிகளும் சேர்ந்து நம் மக்களை பிச்சைக்காரர்களைவிடக் கேவலமாக ஆக்கிவிட்டார்கள்.

கடவுளே!!! என் தேசத்தை நீங்கதான் காப்பாத்தணும்....

சதுரகிரி சுந்தரமஹாலிங்கமே சரணம்!!!

ஜனநாயகத்துக்குத் தகுதியானதா நமது தேசம்????

நமது நாட்டில் இப்போதெல்லாம் லஞ்சம் கொடுப்பதும் வாங்குவதும், கோடிகளில் ஊழலும் மிகவும் சகஜமாக ஆகிவிட்டது.

1) எந்த அரசாங்க போஸ்டிங்குக்கும் ஒரு வசூல் வேட்டை நடத்தப்படுவது வாடிக்கையாக ஆகிவிட்டது. அதற்கு போட்டிபோட்டுக்கொண்டு மக்கள் லஞ்சம் கொடுக்க முன்வருகிறார்கள்(ஒரே போஸ்டிங்குக்கு 2 / 3 பேர் வரை வசூல் செய்கிற கொடுமையும் நடக்கிறது).

2) பெரும்பாலான அரசு ஊழியர்களும் அரசியல்வாதிகளும் தம் கடமையை செய்வதற்கே கையூட்டுப் பெறுவதும்,  அது சகஜமாக ஏற்றுக் கொள்ளப்பட்டுவிட்டதும் மிகவும் கேவலமான ஒன்று.

3) ஓட்டுப் போடுவ‌த‌ற்கும், ஓட்டு வாங்குவ‌த‌ற்கும் ப‌ண‌ம் த‌ர‌வேண்டும் என்ற‌ ஒரு மோச‌மான‌ முன்னுதார‌ண‌த்தை ந‌ம் தாய்த் த‌மிழ‌க‌ம் ஏற்ப‌டுத்திக் கொடுத்து இருக்கிற‌து.. இப்போதே இந்த‌ தேர்த‌ல் அறிக்கையில் இலவசம் மிக்சியா கிரைண்ட‌ரா என்ற‌ வாக்குவாத‌ம் ந‌ட‌க்கிற‌தாம்... தூ... வெட்கக்கேடு.

4) நீதிப‌திக‌ளும் ல‌ஞ்ச‌ம் கொடுத்து நிய‌மிக்க‌ப்ப‌டுகிறார்க‌ள் என்று ஒரு கேர‌ள‌ அமைச்ச‌ர் கொழுத்திப் போட்டு வாங்கிக் க‌ட்டிக் கொண்டார். இன்னும், ந‌ம் உச்ச‌ நீதிம‌ன்ற‌ ஒரு முன்னாள் நீதிப‌தியின் உற‌வின‌ர்க‌ள் வ‌ருமான‌த்துக்கு அதிக‌மாக‌ சொத்து சேர்த்திருப்ப‌தாக‌ வ‌ருமான‌ வ‌ரித்துறை கேஸ் ந‌ட‌த்துகிற‌து.

5) ஒரு க‌வ‌ர்ன‌ர் விப‌ச்சார‌ அழ‌கிக‌ளுட‌ன் உல்லாச‌மாக‌ இருப்ப‌துபோல‌ வீடியோ எடுத்து வெளியிடுகிறார்க‌ள்.

6) ஒரு துற‌வி ஒரு ந‌டிகையுட‌ன் உல்லாச‌மாக‌ இருப்ப‌துபோல‌ வீடியோ வெளியாகிற‌து.

7) போலீசைப் ப‌ற்றிக் கேட்க‌வேண்டாம். அவ‌ர்க‌ள் மான‌ம் ஒவ்வொரு நெடுஞ்சாலை ஓர‌மும் ஒவ்வொரு சிக்ன‌லின் முன்பும் காற்றில் ப‌ற‌க்கிற‌து. ஒரு க‌ம்ப்ளைய்ண்ட் கொடுக்க‌ தைரிய‌மாக‌ போலீஸ் ஸ்டேச‌ன் போக‌ முடிய‌வில்லை.

8) ராணுவ‌த்திலும் த‌ள‌வாட‌ங்க‌ள் வாங்குவ‌திலும், ராணுவத்துக்கு சொந்த‌மான‌ நில‌ங்க‌ளை கொள்ளை அடித்த‌திலும் அவர்களின் லட்சணம் ச‌ந்தி சிரிக்கிற‌து.

9) ஒவ்வொரு தொழில‌திப‌ரும் ஏதேனும் ஒரு வித‌த்தில் ல‌ஞ்ச‌ம் கொடுப்ப‌து வாடிக்கையாக‌ப் போகிவிட்ட‌து. அர‌சிய‌ல் க‌ட்சிகளுக்காக‌ட்டும், அமைச்ச‌ர்க‌ளுக்காக‌ட்டும் அவ‌ர்க‌ள்தான் இதை முக்கிய‌மாக‌ ஊக்குவிக்கிறார்க‌ள்.

இன்னும் ஏராள‌மாக‌ ந‌ம் ச‌மூக‌, அர‌சிய‌ல் அமைப்பில் ல‌ஞ்ச‌மும் ஊழ‌லும் ஒழுக்கமின்மையும் பூர‌ண‌மாக‌ ஒரு ர‌த்த‌ப் புற்றுநோயைப் போல‌ ஊடுறுவி விட்ட‌து.

இதெல்லாம் நமக்கு வேண்டாம் என்று வெளிநாடுகளுக்கு வேலைக்கு செல்லும் மக்களையும் இவர்கள் விடவில்லை. ந‌ம‌து தேச‌த்தைச் சேர்ந்த‌ மக்க‌ள் வெளிநாடுக‌ளில் க‌ஷ்ட‌ப்ப‌டும்போது கூட‌ உத‌விசெய்ய‌ ம‌ன‌மில்லாத‌ அர‌சாங்க‌ம்தான் இங்கு ந‌டைபெறுகிற‌து. உதார‌ண‌ம் ‍ இல‌ங்கை, எகிப்து, லிபியா, ஆஸ்திரேலியா, வ‌ளைகுடாநாடுக‌ள், ம‌ற்றும் ப‌ல‌. தூத‌ர‌க‌ங்க‌ள் பெய‌ருக்கு, பொம்மை அலுவ‌ல‌க‌ங்க‌ளாக‌ இய‌ங்குகின்ற‌ன‌வோ என்ற‌ ச‌ந்தேக‌மும் வ‌ருகிற‌து.

ந‌ம‌து வ‌ரிப்ப‌ண‌ம் கொள்ளைய‌டிக்க‌ப்ப‌ட்டு க‌ருப்புப்ப‌ண‌மாக‌ வெளிநாடுக‌ளில் யார்யார் பெய‌ரிலோ ப‌துக்க‌ப்ப‌டுவ‌தைப் பார்க்கும்போது ஒரு ச‌மூக‌ப் பிர‌க்ஞை உள்ள‌ குடிம‌க‌னாக‌ என்னால் ம‌னமுவந்து வ‌ரிகட்ட‌ முடிய‌வில்லை. நான் ஏன் வ‌ரிக‌ட்ட‌வேண்டும் என்ற‌ சிந்த‌னை இய‌ற்கையாக‌ எழுகிற‌து.(என்ன‌ செய்வ‌து? வேற‌ வ‌ழி இல்லை)

எவ்வ‌ள‌வோ இல்லைக‌ள் இருந்தாலும் ந‌ம் தேச‌ம் என்ற‌ ப‌ற்று ம‌ட்டும் குறைய‌வே இல்லை.

இத‌ற்கு தீர்வு என்ன‌வாக‌ இருக்க‌முடியும் என்று யோசித்த‌போது என்னால் கீழ்க்க‌ண்ட‌ கேள்விக‌ளைத் த‌விர்க்க‌ முடிய‌வில்லை.

1)நாம் உண்மையிலேயே ஜ‌ன‌நாய‌க‌த்துக்குத் த‌குதியுட‌ய‌வ‌ர்க‌ள் தானா?

2)இப்ப‌டிப்ப‌ட்ட‌ ஒரு சுத‌ந்திர‌ம் ந‌ம‌க்குத் தேவையா?

3)சில / பல‌ ஆண்டுக‌ள் (இந்த‌ நோயைக் குண‌ப்ப‌டுத்த) சுத‌ந்திர‌த்தையும் ஜ‌ன‌நாய‌க‌த்தையும் விட்டுக் கொடுத்தால்தான் என்ன‌??

இப்போது ந‌ம‌க்குத் தேவை ஒரு மாவீர‌ன் சுபாஷ் ச‌ந்திர‌ போஸ் போன்ற‌ ஒரு வீர‌மும் விவேக‌மும் துணிவும் உள்ள‌ ஒரு இரும்புத் த‌லைமை. அது எங்கிருந்து வ‌ரும் என்றும் புரிய‌வில்லை.

ஒரு தன்னலமில்லாத தலைவனின் ராணுவ‌ ஆட்சி ந‌ம‌க்கு இப்போத‌ய‌ உட‌ன‌டித் தேவை... யார் கொடுப்பார்கள் என்றுதான் தெரியவில்லை...

ஆண்டவா.. மஹாலிங்கம்!!! என் சிந்தனை சரியான்னு தெரியல... ஆனா இதுதான் சரின்னு எனக்குப் படுது...

உங்க கடாட்சம் பூரணமாக வெளிப்பட்டு, இந்த ரத்தப் புற்றுநோயை உடனடியாக் குணப்படுத்தி என் பாரதத் தாய் மீண்டும் தரணியில் தலை நிமிர்ந்து நிற்க வழிசெய்ய ஆவன செய்யுங்கள்...

சதுரகிரிவாழ் சுந்தரனே போற்றி!!!! சதுரகிரி சுந்தர மஹாலிங்கத்துக்கு அரோகரா........

பாக‌ம் 2 - நமது வரிப்பணம் எங்கே செல்கிறது???

நமது ‍வரிப்பணம் எங்கே செல்கிறது??? -இதன் முதல் பாகம் படிக்க இங்கே சொடுக்கவும்..

ஒரு அரசாங்கத்துக்கு நாம் வரி என்று பலவகைகளில் கொடுப்பது எதற்காக?

1) நமக்கு நல்ல உள்கட்டமைப்பு வசதிகள் ஏற்படுத்த‌

2) சிற‌ந்த‌ அர‌சு நிர்வாக‌ம் ஏற்ப‌டுத்த

3) நம் பாதுகாப்புக்கு ராணுவம், போலீஸ், துணைராணுவம், எல்லைப் பாதுகாப்புப் படைகள்,ஏற்படுத்த

4) நம் தேசத்துக்கு ஒரு மதிப்பு சர்வதேச அரங்கில் ஏற்படுத்த‌

ஆனால் நம் தேசத்தில் இப்போது நடப்பது என்ன?

உள்கட்டமைப்பு வசதிகள்

பெருநகரங்களுக்கு மட்டும் ஓரளவுக்கு உள்கட்டமைப்பு வசதிகள் ஏற்படுத்தப்பட்டுள்ளது. மற்ற சிறு குறு நகரங்கள், கிராமங்கள், முற்றிலும் புறக்கணிக்கப்பட்டுள்ளது. மின்சாரமும், சாலைவசதிகளும் இன்னும் சரியான முறையில் ஏற்படுத்தப்படவில்லை...

அரசு நிர்வாகம்

இதைப்பற்றி தனியாகக் கூற வேண்டாம்... ஒரு அரசாங்க வேலை வாங்கவேண்டுமென்றால் லஞ்சம் தர வேண்டும் என்ற நிலை. ஏதாவது அரசு சம்பந்தப் பட்ட பணி நடைபெற லஞ்சம் தரவேண்டிய நிலை. மிகத் தாமதமாக வழங்கப்படும் நீதி.. தாமதப்படுத்தப் படும் தண்டனை நடைமுறைகள்.

போலீஸ், ராணுவம், பாதுகாப்புப்படைகள்

ஒருமுறை த‌மிழ‌க‌ முத‌ல்வ‌ர் காவ‌ல்துறையின் ஈர‌ல் கெட்டுவிட்ட‌து என்று ச‌ட்ட‌ ச‌பையில் கூறினார். அது இன்னும் ச‌ரியாக‌ வில்லை என்றே தோன்றுகிற‌து. ராணுவ‌த்திலும், ஊழ‌லும், ல‌ஞ்ச‌மும் வ‌ன்முறையும் ஊடுறுவ‌ ஆர‌ம்பித்து இருக்கின்ற‌ன‌.. தேச‌ப் பாதுகாப்பு என்ப‌து கேள்விக்குறியாக‌ இருக்கிற‌து.

ந‌ம் தேச‌த்துக்கு ம‌திப்பு

இதுப‌ற்றி வெளிநாடு வாழ் ச‌கோத‌ர்க‌ள் தான் ச‌ரியாக‌க் கூற‌ முடியும். இப்போது,2ஜி ஸ்பெக்ட்ர‌ம், ஆத‌ர்ஷ், காம‌ன்வெல்த் போட்டி ஊழ‌ல்க‌ளின் க‌ருணையால் ந‌ம‌து தேசத்தின் ம‌திப்பு ச‌ர்வ‌தேச‌ ச‌ந்தையில் அத‌ல‌ பாதாள‌த்தில் தான் இருக்கிற‌து.

இவ்வ‌ள‌வு இருந்தும் ந‌ம‌க்கு ஓர‌ள‌வுக்கு சில‌ விச‌ய‌ங்க‌ள் கிடைத்திருக்கின்ற‌ன‌ :

1) சில ஆப்பிரிக்க‌ நாடுக‌ள் போன்ற‌ பாதுகாப்புக் குறைபாடுக‌ள் இல்லை. குற்ற‌ங்க‌ள் ச‌ற்று குறைவு.

2) இப்ப‌டிப் ப‌ட்ட‌ நிலையிலும் ஓர‌ள‌வுக்கு நிலையான‌ அர‌சாங்க‌ம் இருப்ப‌தால் தொழில் வ‌ள‌ர்ச்சி அடைத‌ல்..

3) ந‌ம‌க்கு நாமே என்று சுய‌ந‌ல‌முட‌ன் வாழ‌ நினைத்தால் ஓர‌ள‌வுக்கு த‌டையில்லா வாழ்க்கைமுறை.

4) இன்னும் ந‌ம் க‌லாச்சார‌ பாரிய‌ம்ப‌ரிய‌ வேர் நிலையாக‌ இருப்ப‌தால் மேற்கு நாடுக‌ள் போன்ற‌ ஒரு ஒழுக்க‌க் கேடு வ‌ராம‌ல் இருப்ப‌து.

5) ஓரளவுக்கு கருத்து சுதந்திரம் ஆரோக்கியமாக இருப்பது.

 

இது போதுமா? இவையும் எவ்வளவு நாள் நிலைக்கும்?? தெரியவில்லை... ஆனால் இப்போது இருக்க‌க்கூடிய‌ நிர்வாக‌ சீர்கேட்டைப் பார்க்கும்போது ரொம்ப‌ நாள் இந்த சந்தோஷம் நீடிக்கும் என்று தோன்ற‌வில்லை.

காலமும் கடவுளும்தான் பதில் சொல்லவேண்டும்.

இந்த மார்ச் மாதத்தில் கட்ட வேண்டிய வருமான வரிகளெல்லாம் மொத்தமாக பிடித்தம் செய்வதைப் பார்க்கும் போது மனம் வெம்புகிறது. இதில் பெரும்பகுதி வெளிநாடுகளுக்கு பல்வேறு ஊழல்கள் செய்யப்பட்டு கடத்தப் படுவதைக் கேள்வியுறும்பொழுது நெஞ்சு கொதிக்கிறது.

நேற்றய (09 மார்ச் 2011) Headlines Today செய்தியில்  தோராயமாக‌ சுமார் 8 லிருந்து 30 பில்லியன் அமெரிக்க டாலர் மதிப்புடைய கருப்புப் பணம் ஒவ்வொரு ஆண்டும் நம் பாரத தேசத்திலிருந்து மட்டும் சுரண்டப்படுவதாக தெரிவித்தார்கள். இதுவும் மிகவும் குறைந்தபட்ச மதிப்பீடு என்று வேறு கூறி வயிற்றெரிச்சலைக் கிளப்பினார்கள்.

ஒன்றும் புரியவில்லை... எனக்குதான் மறை கழண்டு விட்டதா என்றும் தெரியவில்லை... கடவுள் தான் இந்த தேசத்தை இந்த துரோகிகளிடம் இருந்து காப்பாத்தணும்...

கடவுளே காப்பாத்து. சதுரகிரியாரே சரணம்... மஹாலிங்கமே போற்றி....

நமது ‍வரிப்பணம் எங்கே செல்கிறது???

நேற்று (09-03-2011)  இரவு Headlines Today நியூஸ் சேன‌லில் க‌ருப்புப்ப‌ண‌ம் எவ்வாறு வெளிநாடுக‌ளில் ப‌துக்க‌ப்ப‌டுகிறது என்று ச‌ற்று விரிவாக‌ காண்பித்தார்க‌ள். அது ப‌ற்றி, அதிலிருந்து, நான் புரிந்து கொண்ட‌  வ‌ரையிலான‌ ஒரு ப‌திவு :

இப்போது ஒருவ‌ரிட‌ம் பணம் / க‌ருப்புப்ப‌ண‌ம் அதிக‌மாக இருக்கிற‌து அல்ல‌து அதிக‌மாக‌ ச‌ம்பாதிக்க‌ முடியுமாக‌ இருப்ப‌வ‌ர்க‌ள் (இங்கு ஊழல் அர‌சிய‌ல்வாதிக‌ள், முறைய‌ற்ற‌ வ‌ழியில் வ‌ருமான‌ம் ஈட்டுப‌வ‌ர்க‌ள், ஈட்ட‌ முற்ப‌டுப‌வ‌ர்க‌ள், ஊழ‌ல் அர‌சு அதிகாரிகள், சர்வதேச தீவிரவாதிகள் என்று போட்டுக் கொள்ளலாம்) என்று வைத்துக்கொள்வோம். இந்த‌ மாதிரி Tax Heavens என்று சொல்ல‌க்கூடிய நாடுக‌ளில் இருக்கக் கூடிய‌ பாங்குக‌ளின் அதிகாரிக‌ள் இவ‌ர்க‌ளை அணுகுவார்க‌ள். அல்ல‌து இவ‌ர்களே ஏற்க‌னேவே இந்த‌ மாதிரி நாடுக‌ளில் அக்க‌வுண்ட் இருக்கும் ஆசாமிக‌ளிட‌ம் சொல்லி என‌க்கும் ஒரு அக்க‌வுண்ட் வேண்டும் என்று ஏற்பாடு செய்ய‌ச் சொல்வார்க‌ள்.

இந்த‌ மாதிரி மீட்டிங்குகள் பெரும்பாலும் GULF Countries என்று சொல்ல‌க்கூடிய‌ வ‌ளைகுடா நாடுக‌ளில் ந‌ட‌க்கும் ஏதாவ‌து ஒரு விழாவில் (க‌லை விழா, ஷாப்பிங் திருவிழா,கிரிக்கெட் போட்டிகள் மற்றும் பல) ம‌ற்ற‌வ‌ர்க‌ளுக்கு ச‌ந்தேக‌ம் வ‌ராத‌ப‌டி ஏற்பாடு செய்ய‌ப்ப‌ட்டு ந‌ட‌க்கும்.

இப்போது அந்த‌ வ‌ங்கிக‌ளின் ஏஜெண்ட் அவர்க‌ளிட‌ம் உள்ள‌ அமௌண்ட்க்குத் த‌குந்தாற்போல‌ ஏதாவ‌து ஒரு நம்பிக்கையான‌ ந‌ப‌ரையோ அல்ல‌து அந்த‌ நாட்டில் உள்ள‌ ஒரு வ‌க்கீலையோ அல்ல‌து அந்த‌ நாட்டில் ப‌திவு செய்ய‌ப்ப‌ட்டுள்ள‌ ஏதாவ‌து ஒரு ட்ர‌ஸ்டையோ அல்ல‌து அந்த‌ நாட்டில் உள்ள‌ ஏதாவ‌து ஒரு க‌ம்ப‌னியையோ அவர்க‌ளின் Nominee நாமினியாக‌ இருக்க‌ச்செய்வார்க‌ள்.

அவ‌ர்க‌ளிட‌ம் இருக்கும் ப‌ண‌த்துக்குத் த‌குந்தாறபோல் அவ‌ர்க‌ளே ஒரு புது க‌ம்ப‌னியையோ அல்ல‌து ஒரு புது ட்ரஸ்டையோ புதிதாக‌வும் தொட‌ங்கிக் கொள்ள‌லாம்.

இங்கு க‌வ‌னிக்க‌ப்ப‌ட‌ வேண்டிய‌ முக்கிய‌ விஷ‌ய‌ம் :

1) இந்த‌ அக்க‌வுண்ட்க்காக‌ அவ‌ர்க்ள் நேர‌டியாக‌ போக‌வேண்டிய‌தில்லை.
2) அவ‌ர்கள் ப‌ற்றி எந்த‌த் த‌க‌வ‌லும் தெரிவிக்க‌ வேண்டிய‌தில்லை பெய‌ர் உட்ப‌ட‌...(????)

இப்போது இந்தியாவில் இருந்து ப‌ண‌ம் எவ்வாறு இந்த‌ அக்க‌வுண்ட் க‌ளுக்கு அனுப்ப‌ப் ப‌டுகிற‌து என்று பார்போம்.

1) Over Invoicing  : அந்த‌ நாடுக‌ளில் இருக்கும் ஏதாவ‌து ஒரு க‌ம்பெனியில் இருந்து ஏதாவ‌து ஒரு பொருள் அல்ல‌து சர்வீஸ் செய்த‌தாக‌ இந்தியாவுக்கு அனுப்புவார்க‌ள். அத‌ன் உண்மையான‌ விலை ரூ 100 என்றால் அத‌ற்கு ரூ 10,00,000 க்கு பில் அனுப்புவார்க‌ள். அந்த‌ பில்லுக்கு ப‌ண‌ம் செலுத்துவ‌துபோல‌ இந்தியாவிலிருந்து ப‌ண‌ம் அந்த‌ நாட்டிற்கு ப‌த்திர‌மாக‌ப் போய் சேர்ந்துவிடும். அங்கு இருக்கும் இந்த‌ வ‌ங்கி அதிகாரிக‌ளும் இவ‌ர்க‌ளின் நாமினி க‌ளும் இந்த‌ப் ப‌ண‌த்தை ப‌த்திர‌மாக‌ இவ‌ர்க‌ளின் அக்க‌வுண்ட் க‌ளில் செலுத்தி விடுவார்க‌ள்.

2) ஒரு முறை இந்தியாவிலிருந்து த‌னி விமான‌த்தில் ப‌ண‌மாக‌ எடுத்து வ‌ந்து செலுத்தி இருக்கிறார்க‌ளாம்.

3) ஹ‌வாலா முறை : ப‌ண‌த்தை இங்கு இருக்கும் ஹ‌வாலா ஏஜெண்ட் க‌ளிட‌ம் கொடுத்தால் அவ‌ர்க‌ள் அந்த‌ நாட்டில் கொடுத்துவிடுவார்க‌ள்.

 

இந்த‌ மாதிரி நிறைய‌ நாடுக‌ளிலிருந்து (180 என்று கூறினார்கள்) ப‌ண‌ம் இவ்வாறு அந்த‌ Tax Heavens க‌ளுக்கு க‌ட‌த்த‌ப்ப‌ட்டு ப‌துக்கப் ப‌டுவ‌தாக‌க் கூறினார்க‌ள்.

இந்த‌ நாடுக‌ளிலிருந்து இவ்வாறு ப‌துக்கி வைத்திருப்ப‌வ‌ர்க‌ளின் ப‌ட்டிய‌லை சில‌ ஆண்டுக‌ளுக்கு முன் அமெரிக்கா மிர‌ட்டி வாங்கிக் கொண்ட‌தாக‌வும் செய்தி க‌சிகிற‌து. (இப்போது புரிகிற‌து ஏன் இந்த‌ அர‌சிய‌ல்வாதிக‌ள் அமெரிக்காவுக்கு அடிமையாக‌ இருக்க‌ விரும்புகிறார்க‌ள் என்று)

இந்த‌ வ‌கைமுறைக‌ளைப் பார்க்கும் போது என‌க்குத் தோன்றுவ‌து எல்லாம் பொறிவைத்து எலிப் பிடிக்கும் உபாய‌ம் தான்.

1) முதலில் இந்த‌மாதிரியான் Tax Heavens க‌ளை ஏற்ப‌டுத்துவ‌து (பொறி)

2) அதில் வ‌ள‌ரும் நாடுக‌ளில் இருக்கும் ஊழல் அர‌சிய‌ல்வாதிக‌ளையும் தொழில் அதிப‌ர்க‌ளையும் அர‌சு அதிகாரிக‌ளையும் தீவிர‌வாதிக‌ளையும் முத‌லீடு செய்ய‌த் தூண்டுவ‌து (வ‌டை)

3) அந்த‌ விவ‌ர‌ங்க‌ளை அந்த‌ நாடுக‌ளிருந்து வாங்கி அவ‌ர்க‌ளை மிர‌ட்டுவ‌த‌ற்குப் ப‌ய‌ன்ப‌டுத்துவ‌து. (பொறியில் எலி சிக்கிக் கொண்ட‌து)

இதையெல்லாம் பார்க்கும்போது ந‌ம‌து ஊழல் அர‌சிய‌ல் வாதிக‌ளும் அதிகாரிக‌ளும் ந‌ம‌து பார‌த‌ மாதாவின் மான‌த்தை விலைக்கு விற்றுவிட்டார்க‌ள் என்றே எண்ண‌த் தோன்றுகிற‌து.

கேவ‌ல‌ம்.

என்ன‌ செய்ய‌லாம்???

க‌ட‌வுள் தான் இவ‌ர்க‌ளுக்குத் தண்ட‌னை த‌ர‌ணும். ஏன்னா ம‌னித‌ன் த‌ண்ட‌னை த‌ருகின்ற‌ இட‌த்தில் இப்போது இருப்ப‌வ‌ர்க‌ள்தான், த‌வ‌று செய்திருப்ப‌தாக‌த் தோன்றுகிற‌து.

மஹாலிங்க‌ம்!! இவ‌ர்க‌ளுக்கெல்லாம் த‌குந்த‌ த‌ண்ட‌னையை நீங்க‌தான் வ‌ழ‌ங்க‌ணும்.

ச‌துர‌கிரியாருக்கு ச‌ர‌ண‌ம்!!! ம‌ஹாலிங்க‌த்துக்கு அரோக‌ரா!!!!

கட்சிகளின் கவனத்திற்கு.....

இந்த தேர்தல் ஆண்டில், நமது அடுத்த 5 ஆண்டு விதியை நிர்ணயிப்பதில், இப்போது இருக்கும் அரசியல் கட்சிகளின் பங்கு அதிகம் இருக்கிறது. இந்தத் தேர்தல் களத்தில் அவர்களிடம், வாக்காளர்களாகிய நாம் எதிர்பார்ப்பது பற்றிய எனது சிந்தனைகள்.

வேட்பாளர்கள் தேர்வு :

முதலில் சமூக விரோதிகளுக்கும்,  ஊழல் செய்தவர்களுக்கும்  தேர்தலில் போட்டியிட வாய்ப்பு மறுக்கப்படவேண்டும்.

தொகுதிகள் பற்றி அதிகம் தெரிந்த, தொகுதி மக்களுக்கு நன்மை செய்யவேண்டும் என்ற எண்ணம் உள்ள, கறை படியாத கரங்களுடன் கூடிய வேட்பாளர்களையே தேர்வு செய்ய வேண்டும்.

ஒவ்வொரு சட்டமன்றத்தொகுதியிலும் இருக்கும் குறைபாடுகள், மக்களின் தேவைகள், வாழ்வாதாரங்களைப் பாதுகாக்க எடுக்கவேண்டிய நடவடிக்கைகள் பற்றிய ஒரு பட்டியல் தயாரித்து, கட்சியிடம் வழங்கி, அது மக்கள் மன்றத்தில் முன் வைக்கப்பட்டு, ஒவ்வொரு வேட்பாளரும் தேர்தலை சந்திக்க வேண்டும்.

இப்படிப்பட்ட வேட்பாளர்கள், படித்தவர்களாகவோ, வசதி குறைவானவர்களாகவோ இருந்தாலும் கட்சிகள், மக்கள் நலன் கருதி இவர்களுக்கு வாய்ப்பு அளித்து ஜெயிக்கவைக்கவேண்டும்.

தொகுதி மக்களும், தொகுதியும் செழிப்பாக இருந்தால் அடுத்த தேர்தலில் குறைந்த செலவு செய்தாலே ஜெயிப்பதற்கு வாய்ப்பு ஏற்படும்.

மந்திரிகள் தேர்வு :

ஒவ்வொரு துறையைப் பற்றி முழுதும் தெரிந்த, ஒரு சிறந்த நிர்வாகத் திறன் கொண்ட நபர்கள் மட்டுமே மந்திரிகளாக நியமிக்கப்பட வேண்டும்.

இவர்களுக்கு இடையூறு இல்லாத சூழலை ஏற்படுத்திக் கொடுத்தாலே மாநிலம் சிறந்த வளர்ச்சிபெறும்.

மந்திரி ஆக விரும்புபவர்கள் ஒவ்வொருவரும் அந்தந்தத் துறைகளில் செய்ய விரும்பும் பணிகள் பற்றிய பட்டியல் தயார் செய்து கட்சிகளிடம் அளித்து அதன் அடிப்படையில் மந்திரிகள் தேர்வு செய்யப்படவேண்டும்.

ஒவ்வொரு மந்திரிக்கும் துணையாக ஆர்வமும் துடிப்பும் உள்ள ஒரு இளைஞர் படை ஏற்படுத்தப் பட்டு துறையின் பணிகள் ஆய்வு செய்யப்படவேண்டும்.  ஒவ்வொரு பகுதியின் பள்ளி கல்லூரிகளின் மாணவர்களின் பங்களிப்பும் ஆர்வமுள்ள தனியாரின் பங்களிப்பும் இதில் ஏற்றுக்கொள்ளப்பட வேண்டும்.

அனைத்து அரசியல் கட்சிகளும் மக்களின் முன்னேற்றத்துக்கு முழு மனதுடன் பாடுபட உறுதி கொண்டு செயல் படவேண்டும்.

பிரார்த்தனை நல்லாவே இருக்கு... மஹாலிங்கம் இத கொஞ்சம் அவசரமாக் கவனிங்க...  நாங்கள்லாம் ரொம்ப கஷ்டப்பட்டுக்கிட்டு இருக்கோம்...  ஒரு விடியலை எங்களுக்குக் காட்டுங்க...

சதுரகிரியாரே போற்றி.... ஓம் நம சிவாய....

நல்லவர்களின் வல்லமை????

இப்போதெல்லாம்,  நல்லவர்களைக் காண்பதே அரிதாக ஆகிவிட்டது. முக்கியமாக பொதுவாழ்வில். ஆனால் இன்றைய சூழலில், காரியம் சாதிக்கும் வல்லவர்களே அதிகம் பொதுவாழ்க்கைக்கு வருகிறார்கள். இவர்கள் பெரும்பாலும் சுயநல வாதிகளாகவும், சந்தர்ப்பவாதிகளாகவும், சமூக விரோதிகளாகவுமே இருக்கிறார்கள். இவர்கள் நல்லவர்களாக இருந்தால் மட்டுமே நாட்டுக்கும் சமுதாயத்துக்கும் நல்லவை நடக்கும். சிலர் பொதுவாழ்வுக்கு வரும்பொழுது நல்லவர்களாகவும், நாளடைவில் சுயநலவாதிகளாகவும் சமூகவிரோதிகளாகவும்(அல்லது அவர்களுக்கு ஆதரவளிப்பவர்களாகவும்) மாறிவிடுகிறார்கள்...

ஏன் இந்த நிலை?? என்ன செய்தால் இதை மாற்றமுடியும்?? எனது சிந்தனைகள்...

ஏன் இப்படி??

முதலில், நல்லவர்களாக வளர்க்கப்பட்டவர்கள், பெரும்பாலும் பய உணர்வுடனே வளர்க்கப்பட்டிருக்கிறார்கள். முக்கியமாக, பெற்றோரின் சுயநலமே அவர்களின் குழந்தைகளிடம் பிரதிபலிக்கிறது.  இது ஒரு உளவியல் ரீதியான பிரச்சினை. நமது பெரும்பாலான நடுத்தர வர்க்கத்துப் பெற்றோர்களின் அணுகுமுறை நாம், நமது என்ற குறுகிய வட்டத்துக்குள் அவர்களை அழுத்தி, அவர்களின் பரந்த மனப்பான்மையை வளர்க்காமல் விடுவதே இதன் மூலகாரணம்.

குழந்தைகளை வெளி உலகிற்கு சிறப்பாக அறிமுகம் செய்வது ஒவ்வொரு பெற்றோரின் கடமை. இதை வீட்டிற்கு வரும் விருந்தினரில் தொடங்கி வெளியில் சந்திக்கும் ஆட்கள் வரை பழக்கப் படுத்தப்படவேண்டும். இதில் ஆசிரியர்களின் பங்கும் மிகப் பெரிது. ஆனால் இப்போது இது பெரும்பாலும் தவறான முறையிலேயே செய்யப்படுகிறது. குழந்தைகள் வெளியாட்களிடம் அதிகம் பழகினால் கெட்டுப்போய்விடுவார்கள் என்ற சிந்தனையே அதிகம் வளர்க்கப்படுகிறது.

இதனால்தான் சிறிய பிரச்சினைக்குக் கூட அவர்களால் சுயமாக சமாளிக்கத்தெரியாமல் பிறரைச் சார்ந்தே இருக்கிறார்கள். கூச்ச சுபாவத்துடனே வளர்கிறார்கள். இதனால் இவர்களுக்குத் தேவையான காரியங்கள் மிகத் தாமதமாகவே நடைபெறுகின்றன. சில நேரங்களில் நடைபெறாமலே போவதற்கான வாய்ப்பும் உண்டு. இவர்கள், தானே, தாங்களாக செய்துகொள்ளும் வேலைகளில் வல்லவர்களாகவும், வெற்றி அடைபவர்களாகவும் , பிறரை வேலைவாங்கும் விஷயத்தில் தோல்வியடைபவர்களாகவும் இருக்கிறார்கள். இதில் சிலர் நாளடைவில் தேர்ச்சி பெற்று மிகவும் சிறப்பான நிலையை அடைகிறார்கள். இந்த நிகழ்வில், தங்களின் தனித்தன்மையையும்,  நல்ல சிந்தனைகளையும் 
பெரும்பாலானோர் இழந்து விடுகிறார்கள். வெகு சிலரே இதில் தப்பித்து உயர்நிலையை அடைகிறார்கள்.

நல்லவர்கள், இதிலிருந்தெல்லாம்  தப்பித்து உயர் பதவிகளுக்கு வரும்போதுதான் அவர்கள் குறிவைக்கப்பட்டு ஒதுக்கப்படுகிறார்கள். அல்லது சந்தர்ப்பவாதிகளுடன் கூட்டு சேர நிர்ப்பந்திக்கப்படுகிறார்கள். அந்த நேரங்களில் அவர்களுக்கு இந்த சமூக சூழல் சாதகமாக அமையாத பட்சத்தில் மிகக் கடுமையாக பாதிக்கப்படுகிறார்கள். இதுபற்றிய முந்தய பதிவு ஏன் இப்படி இருக்கிறார்கள்???

நல்லவர்கள் உயர் பதவிகளில் இருக்கும் போது இப்போதெல்லாம் அதிக தவறுகள் நடக்கின்றன. அவர்களுக்கு ஒரு மரியாதையோ, அல்லது இயல்பாக ஒரு உயர் அதிகாரிக்குத் தரவேண்டிய குறைந்தபட்ச தகவல்களையோ அவர்களுக்கு கீழே வேலைபார்ப்பவர்கள் தருவதில்லை. இதனால் அவர்களுக்கு அவர்களின் துறைகளின் மீது இருக்கும் கட்டுப்பாடு குறைந்து விடுகிறது. விளைவு, ஒழுங்கீனம், ஊழல், ஏமாற்றுதல்.....


என்ன செய்யவேண்டும்?

இருக்கும் நல்லவர்கள் வல்லவர்களாக மாறுவது கடினமே... ஏனெனில் இது அவர்களின் ரத்தத்தில் ஊறவில்லை. ஆனால் முடியாத காரியமில்லை. ஆன்மீகப் பயிற்சிகளும், சமூகப் பயிற்சிகளும், முன் முனைப்பும், அதிகம் கொண்டு இவர்கள் மாற முயற்சி செய்யவேண்டும்.

மேலும், இந்த மாற்றம் குழந்தையிலிருந்து ஆரம்பிக்கப்படவேண்டும். குழந்தைகளுக்கு மாணவப்பருவத்திலிருந்தே நேர்மையும் தைரியமும் சுயசார்பு நிலையும் கற்பிக்கப்படவேண்டும். இதற்கு முதலில் பெற்றோரும்,  ஆசிரியர்களும்,  கல்வியாளர்களும் நேர்மையைக் கடைப்பிடிக்கப் பழகவேண்டும். கல்விக்கூடங்கள் மாணவர்களின் நேர்மையை வளர்க்கப் பாடுபட வேண்டும். வாழ்க்கைக் கல்வியும், ஆன்மீகக் கல்வியும் அனைவருக்கும் சிறப்பாக போதிக்கப்படவேண்டும்.
நாம் நல்லவர்களாக இருந்தால்தான் நமது குழந்தைகளை நல்லவர்களாக வளர்க்க முடியும். எனவே அவர்களுக்கு உதாரணமாக இருப்பதற்காகவாவது அனைவரும் நல்ல வழிக்குத் திரும்ப வேண்டும். இதில் சாதாரண பாமரனிலிருந்து, பெரிய தலைவர்வரை அனைவரும் பங்கு பெறவேண்டும். அப்போதுதான் ஒரு சிறப்பான எதிர்கால சமுதாயம் உருவாகும்.

இதெல்லாம் செய்தால் / நடந்தால் மிக நன்றாக இருக்கும்... என்ன செய்வது... எல்லோரும் எப்படி அடுத்தவர்களைவிட அதிகம் பணம் சம்பாதிப்பது என்ற சிந்தனையிலேயே அதிக கவனமாக இருப்பதால், இந்த சிந்தனை விட்டுப்போகிறது.


ஊதுற சங்க ஊதியாச்சு... இனிமேல் அவங்க பாடு, அந்த மஹாலிங்கம் பாடு.. சதுரகிரியாரே சரணம்..

ஓம் நம சிவாய....

கருப்புப் பணம்...

இப்போது எல்லாம் அடிக்கடி செய்தி ஊடகங்களில் கருப்புப் பணம் பற்றியும் அவற்றை வெளிநாடுகளிலிருந்து இங்கு கொண்டுவருவது பற்றியும் பெச்சு அடிபடுகிறது.  இதுபற்றிய எனது சிந்தனைகள்..

எது கருப்புப்பணம் :

வருமான வரிக் கணக்கில் வராத , காட்டப்படாத அனைத்துமே கருப்புப்பணமே.

நாம் ஒவ்வொரு ஆண்டும் வருமான வரிகட்டுகிறோம். அவ்வாறு கட்டிவிட்டு, வருமான வரித்துறைக்கு, எனது வருமானம் இவ்வளவு, அதற்கு இவ்வளவு வரி கட்டத் தேவை என்று கணக்குப் பார்த்து , இவ்வளவு வரி கட்டி இருக்கிறேன் என்று அறிக்கை தாக்கல் செய்கிறோம்.

இவ்வாறு காட்டப்படும் வருவாய்க்கு அதிகமாக சேர்க்கப்படும் அனைத்து சொத்துக்களும், வருமானங்களும் கருப்புப்பணத்தில் அடங்கும்.

எப்படி சேர்கிறது?

இருவழிகளில் கருப்புப்பணம் வருகிறது :

1) நியாயமான வழியில் வரும் வருமானத்துக்கு, சரியான கணக்குக் காட்டாமல், வரி கட்டாமல் (எந்த வரியாக இருந்தாலும்)  இருத்தல். இதில் தொழிலதிபர்களும், சுய தொழில் செய்பவர்களும், சினிமாத்துறையை சார்ந்தவர்களும் வருகிறார்கள். -முதல் வழி

2) முறைகேடான வழியில் பணம் சேர்த்தல். இதற்குக் கணக்குக் காட்ட முடியாது. எனவே முழுதும் கருப்புப் பணமே. இது பெரும்பாலும், லஞ்சம், ஊழல், கடத்தல், ஹவாலா, கொள்ளை, மாபியா போன்ற சட்ட விரோதமாக சேர்க்கப் பட்டதாக இருக்கும். - இரண்டாம் வழி

இதைவைத்து என்ன செய்கிறார்கள்?

ஆடம்பர செலவு அதிகம் செய்கிறார்கள்.

நிலம், வீடு, பங்கு வர்த்தகம் என்று அதிகமாக முதலீடு செய்கிறார்கள்.

வெளிநாடுகளுக்கு பணத்தைக் கொண்டு சென்று ஆடம்பர வாழ்க்கை வாழ முயற்சி செய்கிறார்கள்.

பெருமளவில் வெளிநாடுகளின் வங்கி, சொத்துக்களில் முதலீடு செய்கிறார்கள். இவர்களைக் கவர்வதற்காகவே பல வெளிநாட்டு வங்கிகள், அரசாங்கங்கள் கொள்கைகளை வகுத்து கல்லாக்கட்டுகின்றன.

சட்டவிரோத தொழில்களில் அதிக லாபம் வேண்டி முதலீடு செய்கிறார்கள். இதில் தீவிர வாதிகளுக்கு பொருளுதவி செய்வதும் அடக்கம்.

இதனால் என்ன பாதிப்பு?

நியாயமான வழியில் சேராத பணத்தால் விலைவாசி உயருகிறது. வீட்டு விலை, நிலத்தின் மதிப்பு, கட்டுமானப் பொருட்களுக்கான விலை போன்ற அத்தியாவசியமான தேவைகளின் மதிப்பு பலமடங்கு உயர்ந்ததற்கு இது ஒரு மிகமுக்கிய காரணி. இப்போது நியாயமாக சம்பாதித்து வீடு வாங்குவது என்பது கனவாகவே ஆகிவிட்டது.

இப்படிப்பட்ட தவறானவர்களின் பணப்புழக்கத்தைப் பார்த்து, பிறரும் அது போல வாழ ஆசைப்பட்டு, வருமானத்தை மீறி செலவு செய்தோ, தேவை இல்லாத விஷயங்களை வாங்கி (கார், ஆடம்பர வீடு) அகலக் கால் வைத்தோ தங்களின் கையை சுட்டுக் கொள்கிறார்கள்.

இவ்வாறு புழங்கும் அதிகமான கருப்புப் பணத்தினால் தனிமனித ஒழுக்கம் குறைந்து வருகிறது. பணத்துக்காக எதுவும் செய்யலாம் என்ற மனநிலை பெருக இது ஒரு காரணமாக இருக்கிறது.

அரசாங்கத்துக்கு நியாயமாக வரவேண்டிய வரி வருவாய் வராமல் போவது. இதனால் வளர்ச்சிப் பணிகள் பாதிக்கப் படுவது.

நமது தேசத்தின் மரியாதை சர்வதேச அரங்கில் பாதிக்கப்படுவது.

பங்கு வர்த்தகத்தில் ஏற்ற இறக்கங்கள் அதிகம் ஏற்படுவது அதிக கருப்புப் பணம் அதில் விளையாடுவதுதான். இதனால் பொருளாதார ஸ்திரத்தன்மை பாதிக்கப்படுகிறது.

தீவிரவாதிகளுக்கு ஆயுதங்கள் வாங்க பொருளுதவி செய்ய இந்த கருப்புப் பணம் பெருமளவில் பயன்படுத்தப்படுகிறது. இதனால் நாட்டில் அமைதி கெடுகிறது.

ஏன் கருப்புப் பணம் சேர்கிறது?

அநியாயமான வரி விகிதங்கள். குழப்பமான வரி சம்பந்தப்பட்ட விதிமுறைகள் / நடைமுறைகள். வரிவசூல் செய்வதற்குத் தகுந்தாற்போல்  வசதிகள் செய்யாமல் இருத்தல். நியாயமாக வரி கட்டுபவர்களும் வேறு வழிஇல்லாமல் தான் கட்டுகிறார்கள். ஒரு வாய்ப்புக் கிடைத்தால் அனைவருமே வரி ஏய்ப்பு செய்யத் தயங்கமாட்டார்கள்.

லஞ்சம், ஊழல், சட்ட விரோத செயல்களால் பணம் அதிகமாக சேருவது. அரசாங்கத்தால் இதை தடுக்கவோ இவ்வாறு செய்பவர்களைத் தண்டிக்கவோ முடியாமல் இருக்கும் பரிதாபன நிலை.

தண்டனைகள் வழங்குவதில் இருக்கும் தாமதம். கடுமையான தண்டனைகள் வழங்கப்படாதது. சட்டத்தில் இருக்கும் ஓட்டைகளை கிரிமினல்கள்தான் அதிகம் பயன் படுத்துகிறார்கள்.

சட்டத்தை அமல் படுத்துவதுவதிலும் அரசு எந்திரத்திலும் முறைகேடுகள் அதிகரித்து பரவலாக ஆனது.

இதைத் தடுக்க / குறைக்க என்ன செய்யவேண்டும்?

வரி விகிதங்கள் சீர் செய்யப்பட வேண்டும். வரி சம்பந்தப்பட்ட விதி முறைகள் /  நடைமுறைகள் எளிமைப்படுத்தப் பட வேண்டும். நியாயமான வழியில் சேர்த்த கருப்புப் பணத்துக்கு அபராதமும் அல்லது அதற்கான வரியும் மட்டும் விதித்து மன்னித்துவிடலாம். இதனால் மேலும் வரி ஏய்ப்பு செய்வது தடுக்கப்படும்.

வாங்கும் வரிக்கு ஏற்ப பொதுமக்களுக்கு வசதிகள் செய்து தரப்படவேண்டும். நல்ல உள் கட்டமைப்பு,  சமூகப் பாதுகாப்பு ஏற்பாடுகள், மருத்துவ வசதிகள் செய்து தரப்படவேண்டும். லஞ்ச, ஊழலற்ற அரசு நிர்வாகம் ஏற்படுத்தப்பட வேண்டும். அப்போதுதான் ஏமாற்றாமல் வரிகட்ட வேண்டும் என்ற எண்ணம் மக்களிடம் ஏற்படும். "திருடனாய்ப் பார்த்து திருந்தாவிட்டால் திருட்டை ஒழிக்க முடியாது" என்பது இந்த விசயத்தில் 100க்கு 100 உண்மை.

தவறான, சட்ட விரோத வழிகளில் சேர்த்த கருப்புப்பணம் உடனடியாக பறிமுதல் செய்யப்படவேண்டும். அதை செய்தவர்களுக்கு மிகக் கடுமையான தண்டனைகள் வழங்கப்படவேண்டும். இவர்கள் சமூகத்துக்கும் அரசாங்கத்தும் துரோகம் இழைத்தவர்கள் ஆவார்கள்.

சட்ட திட்டங்கள் எளிமைப்படுத்தப்பட்டு, கடுமையாக அமல் படுத்தப்பட வேண்டும். விரைவில் தண்டனைகள் வழங்க ஏற்பாடுகள் செய்யப்படவேண்டும்.

இப்போது இருக்கக்கூடிய கருப்புப் பணத்தில் ஒரு பகுதி நம் நாட்டிலேயே முதலீடு செய்யப்பட்டுள்ளது. இவைகளின் பெரும்பகுதி பத்திரப்பதிவு அலுவலக பதிவேட்டிலும், பங்கு வர்த்தக பதிவேடுகளிலும், வங்கிகளின் லாக்கர்களிலும், அக்கவுண்ட்களிலும், ஃபிக்சட் டிப்பாசிட் களிலுமே இருக்கிறது.  இவைகளை முறைப்படுத்துவதினாலோ அல்லது பறிமுதல் செய்வதினாலோ நமக்கு அதிக வருமானம் கிடைக்க வாய்ப்பு இருக்கிறது.

இதைவிடுத்து, வெளி நாட்டிலிருந்து கருப்புப்பணத்தைக் கொண்டு வருவது என்பது கனவுதான்.


என்ன செய்வது? இதை செய்யவேண்டிய இடத்தில் இருப்பவர்கள், இதை செய்வதில் ஆர்வம் காட்டாமல் இருப்பதைப் பார்க்கும் போது இவர்களும் இதில் பங்குதாரராக இருக்க அதிக வாய்ப்பு இருப்பதாகவே தோன்றுகிறது.


கடவுளே!!! இந்த நாட்டயும் மக்களையும் காப்பாத்து!!!

சதுரகிரி சுந்தரமஹாலிங்கத்துக்கு அரோகரா!!!!!!

தேர்தல் களத்தில் ஊடகங்களின் பங்கு....

இது தேர்தல் ஆண்டு.  தேர்தலுக்காக எந்தத் தொகுதியில் யாருக்கு செல்வாக்கு அதிதம் என்ற ஆய்வு ஊடகங்களில் நடைபெறுகிறது. ஆனால் மக்களுக்குப் பயனளிக்கக்கூடியதா இது? இந்த நேரத்தில் பொறுப்பான ஊடகங்களின் பணி என்னவாக இருக்கவேண்டும்?

ஒவ்வொரு தொகுதியிலும் இருக்கக்கூடிய தேவைகளின், குறைகளின்  பட்டியல் உடனடியாகத் தயாரிக்கப்படவேண்டும்.

எத்தனை அரசுப்பள்ளிகளில் கட்டிட, ஆசிரியர் பற்றாக் குறைகள் உள்ளன? அவை எவை? எத்தனை கிராமங்களில் பள்ளிகள் இல்லை?  தனியார் கல்விக் கூடங்களின் கட்டண விகிதங்கள் சரியானவைதானா? எத்தனை பள்ளிகள் தரம் உயர்த்தப்படவேண்டும்?

எவ்வளவு சாலைகள அமைக்கப்படவேண்டும்? அவற்றிற்கான விவரங்கள். அனைத்து கிராமங்களுக்கும் சரியான சாலை வசதி செய்யப்பட்டுள்ளதா?

எவ்வளவு பாலங்கள் தேவை? அவற்றிற்கான விளக்கங்கள்.

தொகுதியின் பொருளாதார ஆதாரம் என்ன? பெரும்பான்மையோரின் வாழ்வாதரமாக இருக்கக் கூடிய தொழில் அல்லது வேலைவாய்ப்பு அளிக்கும் தொழில்சாலைகள் என்ன? அவற்றிற்குத் என்ன தேவை? அல்லது அவற்றால் தொழிலாளர்கள் சந்திக்கும் பிரச்சினைகள் என்ன?

விவசாய, குடிநீர்  நீராதாரங்களின் இப்போதய நிலை என்ன? அவற்றை செம்மைப் படுத்த செய்ய வேண்டியது என்ன?

குடிநீர் , கழிவு நீரகற்று வசதி இல்லாத அல்லது சரியாக இல்லாத இடங்கள் எத்தனை? அவற்றை சரி செய்ய என்ன செய்ய வேண்டும்?

இன்னும் எத்தனை கிராமங்களில் மருத்துவ வசதி இல்லை? இருக்கக்கூடிய அரசு மருத்துவமனைகளின் உடனடித் தேவை என்ன? அதற்கு என்ன செய்ய வேண்டும்?

மேலும் பல இருக்கக் கூடிய குறைகள் பட்டியலிடப்படட்டும்.

இந்தப் பட்டியல் ஒவ்வொரு பெரிய கட்சிகளின் வேட்பாளர்களுக்கும் மற்றும் ஜெயிக்கக் கூடிய வாய்ப்பு உள்ள அனைத்து வேட்பாளருக்கும் வழங்கப்படவேண்டும்.

இவற்றிற்கான நிதி ஆதாரங்கள் திரட்டுதல் பற்றி விவாதிக்கப்பட வேண்டும்.

அவர்கள் இந்தக் குறைகளைக் களைய என்ன நடவடிக்கை எடுக்கப்போகிறார்கள் என்ற திட்ட வரைவு கேட்கப்பட வேண்டும்.

இதற்கு கட்சியின் பங்கும் ஆட்சியின் அவசியமும் விவாதிக்கப்படவேண்டும்.

இந்தப் பட்டியலின் மீது விவாதங்களும் பட்டிமன்றங்களும் தொகுதிக்குள் நடத்தப்படவேண்டும். 

சென்ற தேர்தலின் போது இதுபோல எடுக்கப்பட்ட பட்டியலுடன் இப்போதய பட்டியல் ஒப்பீடு செய்யப்பட்டு சென்ற முறை இருந்த மக்கள் பிரதிநிதியின் செயல்பாடுகள் மதிப்பீடு செய்யப்படவேண்டும்.

ஒவ்வொரு நாளும் சில தொகுதி வேட்பாளர்களுடன் இந்த பட்டியலுடன் நேர்முக விவாதங்கள் நடத்தி அவர்களை நல்லவைகளை செய்யத் தூண்டவேண்டும்.


கனவு காண நல்லாத்தான் இருக்கு. என்ன செய்ய? இப்போதய ஊடகங்களுக்கு, சினிமாவையும், அரசியல்வாதிகளின் சாதனைகளைப் பேசவுமே நேரம் சரியாக இருக்கிறது... இவைகளையும் செய்வார்களா???

ஆண்டவா... மஹாலிங்கம், இவங்களுக்கு நல்ல புத்தியக் குடுத்து மக்களுக்காக செயல்பட வையுங்க...

சதுரகிரியாரே போற்றி... அரோகரா....

கால் சென்டர் - ஒவ்வொரு தொகுதிக்கும்....

நம் நாட்டில் எது எதுக்கெல்லாமோ கால் சென்டர் வைத்து டோல் ஃபிரி நம்பர் குடுத்து சேவை தருகிறார்கள். ஏன் ஒவ்வொரு தொகுதிக்கும் ஒரு டோல் ஃபிரி நம்பர் கொடுத்து அரசு அதிகாரிகள் சேவை செய்யக்கூடாது??? இது பற்றிய எனது சிந்தனைகள்...

100,101,102,103.... இப்பிடி வரிசையா மக்களுக்கு சேவை செய்யும் துறைகளைத் தொடர்பு கொள்ள போன் நம்பர்கள் தருகிறார்கள். ஆனால் நமது நாட்டில் பொதுவாக மக்களுக்கு அதிக தொடர்புடைய துறைகளுக்கும் இந்த வசதி விரிவு படுத்தப்படவேண்டும். முடிந்தால் அனைத்து அரசு சேவைகளும் ஒரே எண்ணில் கிடைக்கச்செய்தால் இன்னும் நன்றாக இருக்கும்.

நம் ஏரியாவில் மின் இணைப்பு சரியில்லை, தண்ணீர் வரவில்லை, சாக்கடைத் தேக்கம், ரேசனில் பொருள் கிடைக்கவில்லை (அல்லது எப்போது கிடைக்கும் என்ற விவரம்) மற்றும் இதுபோன்ற உள்ளாட்சி சம்பந்தப்பட்ட குறைகளுக்கு ஒரு டோல் ஃப்ரீ நம்பர் தந்து தகவல் தர அல்லது யாரைத் தொடர்பு கொள்ளலாம் (அவர்களின் போன்நம்பர், முகவரி உட்பட)  என்ற விவரம் பெற இந்த சேவை மிகவும் உதவிகரமாக இருக்கும்.

 இதற்கான தேவை இப்போது இருக்கிறது. இதை அந்தந்தத் தொகுதியின் வார்டு கவுன்சிலரோ, தொகுதி சட்டமன்ற/ நாடாளுமன்ற உறுப்பினரோ இதை செய்ய முன் வரவேண்டும். ஏன் தொகுதியின் குறை நிறைகளைத் தெரிந்து கொள்ளவும், வளர்ச்சிப்பணிகளில் ஏற்படும் தொய்வு, குறைகளைத் தெரிந்து களையவும் இது பயன்படும்.

முடிந்தால், ஆர்வமுள்ள,  ஓய்வு பெற்ற அரசு அலுவலர்கள், காவலர்கள், கல்லூரி மாணவர்களைக் கொண்டு ஒரு சில கண்காணிப்புக் குழுக்கள் அமைத்து,  வரும் புகார்களின் மீது நடவடிக்கை எடுக்கவும் / குறைகளைக் களையவும் நடவடிக்கை எடுக்கலாம்.

இதற்கு ஆகும் செலவை, சட்டமன்ற / நாடாளுமன்ற உறுப்பினர்களின் தொகுதி நிதியில் இருந்து அளிக்கலாம். (முடியுமா என்று தெரியவில்லை)...

யோசிக்க நல்லாத்தான் இருக்கு.. ஆனா செய்வாங்களான்னு தெரியல...

கடவுளே!!! இப்பிடி நல்ல விசயங்கள் நடக்க நீங்கதான் ஆவன செய்யணும்.

ஓம் நம சிவாய!!! சதுரகிரியாரே போற்றி!!!!!

நேர்மையின் மரணம்....

கடந்த 25ம் தேதியில் ஒரு நேர்மையான அரசு அதிகாரியை சமூக விரோதிகள் பட்டப்பகலில் நடு ரோட்டில் வைத்து நெருப்பிட்டுக் கொளுத்திக் கொன்றிருக்கிறார்கள்.  நமது சமூகத்தில் நேர்மையாக நடப்பதனால் சந்திக்க விழையும் சில பரிதாபமான நிகழ்வுகளில் இதுவும் ஒன்றாக ஆகிவிட்டது. இது தவிர, பணியில் தேவையற்ற அலைக்களிப்பு, தேவை இல்லாத பணிமாற்றம், பணி இடைநீக்கம்,  ஆசிட் வீச்சு, குடும்பத்தினருக்குத் தொல்லை, தாக்குதல் இப்படி பலவும் அடக்கம்.  

நேர்மையாகப் பணி செய்வது அவ்வளவு பெரிய குற்றமா?? ஏன் இப்படி ஆகிவிட்டது? என்ன செய்யலாம்? இதுபற்றிய எனது சிந்தனைகள்....

ஏன் இப்படி ஆனது ?

இதற்கு முதல் காரணம் குற்றச்செயல்கள் நடைபெறும்போது ஆரம்பத்திலேயே தடுக்காதது. முளையிலேயே கிள்ளி எரியாமல் விட்டது.. தும்பைவிட்டு வாலைப் பிடித்த கதையாய்ப் போய்விட்டது. இப்படிப்பட்ட குற்றச் செயல்களில் ஈடுபடுவர்களை முதலில் சாதாரணமான தவறுகள்   செய்யும்போதே சரியானபடி தண்டிக்காமல், அவர்களை வளரவிட்டுவிட்டு, இப்போது அவர்கள் சமூக, பண, அரசியல் செல்வாக்கோடு திகழும்போது ஒன்றும் செய்யமுடிவதில்லை.

அரசு நிர்வாகத்தில் இருக்கும் அவலமான நிலை

நிர்வாணமானவர்கள் இருக்கும் ஊரில், கோவணம் கட்டுபவன் பைத்தியக்காரன் என்று சொல்வார்கள். அரசு எந்திரத்தில் இப்போது அங்கங்கே ஆயில் போட்டால்தான் ஆகவேண்டிய காரியங்களே ஆகும் நிலையிருக்கிறது. அதுவும் காசுக்காக எதுவும் செய்யும் அரசும், ஊழியர்களும் பெருகிவரும் சூழல் ஏற்பட்டிருக்கிறது.

அரசுப் பணிகளில் சேர, தேர்தல்களில் போட்டியிட, வெற்றிபெற திறமையைவிட பணமே பிரதானமாக ஆகிவிட்டது. ஆகவே, கிடைக்கும் பதவியை வைத்து, செலவிட்ட பணத்தை எவ்வளவு விரைவில் எடுத்து மேலும் லாபம் பார்க்கவேண்டிய நிலைக்கு பெரும்பாலானோர் தள்ளப்பட்டிருக்கிறார்கள். இப்படிப்பட்ட சூழலில் நேர்மையானவர்கள் இருப்பதே அபூர்வமாகிவிட்டது.அப்படியும் நேர்மையாய் இருப்பவர்களுக்கு இச்சமூகம் "பொழக்கத்தெரியாதவன்(ர்)" என்ற பட்டப் பெயர் கொடுக்கிறது. இந்தச் சமூக சூழலில் நேர்மை என்பது சொல்லப்பட மட்டுமே கூடிய, செயல்படுத்தப்படக் கூடாத ஒன்றாக ஆகிவிட்டது.

தாமதப்படுத்தப்படும் தண்டனைகள்

நமது நாட்டில் எந்தக் குற்றத்திற்கும் தண்டனை கிடைக்க ஏற்படும் காலதாமதம் குற்றம் செய்வதை ஊக்குவிக்கிறது. எப்படியும் தப்பிவிடலாம் என்ற மனப்பான்மை வந்துவிட்டது.

தேவைகள் பெருகிப் போனது

இன்றய "Consumerism" சூழலில் விளம்பரங்களினாலும், சமூக அழுத்தத்தினாலும், தேவைகள் பெருகிப் போனது. தேவைக்காக பொருள் வாங்கியது போய், விளம்பரங்களுக்காக வாங்கவேண்டிய அழுத்தம் வந்தது.

என்ன செய்யலாம் ?

முதலில் நேர்மையான அதிகாரிகளுக்கு பணிப் பாதுகாப்பும், சமூகப் பாதுகாப்பும்,  சட்டப் பாதுகாப்பும் தேவைப்படுகிறது.

இவர்களுக்கு பிரச்சினைகள் வரும்போது, மீடியாவில் முக்கியத்துவம் கொடுத்து செய்திகள் வெளியிட்டு அந்த பிரச்சினைகளிலிருந்து வெளிவர உதவிகள் செய்ய வேண்டும்.

இப்படிப்பட்டவர்களுக்கு இலவச சட்ட உதவி உடனடியாக வழங்கப்பட வேண்டும்.

சமூகத்தில் லஞ்சம் வாங்குபவர்கள், ஊழல் செய்பவர்கள் இவர்களை ஒதுக்கிவைக்கலாம். (இவர்களுக்குத்தான் யார் தயவும் தேவை இல்லையே... :-(   ). முக்கியமாக பள்ளி கல்லூரிகளில் தவறு செய்பவர்களின் குழந்தைகளிடையே ஒரு விழிப்புணர்வு ஏற்படச்செய்யவேண்டும். இவர்களாலேயே இவர்களின் பெற்றோரைத் திருத்த முடியும். ஏனெனில் இவர்களுக்காக சொத்து சேர்ப்பதற்காகத்தானே த்வறுகள் செய்கிறார்கள்...

குற்றச்செயல்களுக்கு உடனடியான தண்டனைகள் வழங்கப்படவேண்டும்.  லஞ்சம் ஊழல் இவற்றுக்கான தண்டனைகளும் கடுமையாக்கப்படவேண்டும். முக்கியமாக சிலராவது கடுமையாக தண்டிக்கப்படவேண்டும்.  அப்போதுதான் தண்டனைகளுக்கான பயம் இருக்கும். தாமதிக்கப்பட்ட நீதி மறுக்கப்பட்டதாகவே ஆகிவிடுகிறது..

யோசிக்க நல்லாத்தான் இருக்கு... நடக்கணுமே...

மஹாலிங்கமே சரணம்... ஏதாவது செஞ்சு இந்த நிலைய மாத்துங்க.. அரோஹரா...

மக்கள்தொகை பெருக்கமும்.. தேச வளர்ச்சியும்...

நமது மக்கள்தொகை சீனாவை வெகுவிரைவில் முந்திவிடும் போலத் தெரிகிறது. பாரதியார்காலத்தில்(1920) 30 கோடியாக இருந்த மக்கள்தொகை இப்போது (2011) 115 கோடியாக ஆகிவிட்டது. ஒவ்வொரு ஆண்டும் நமது ஜனத்தொகை 2 கோடி அதிகரித்துவருகிறது. இது நமது தேச வளர்ச்சியைப் பெரிதும் பாதிக்கிறது. சிறு / பெருநகரங்களில் வாழும் சில கோடி நபர்களைத்தவிர பிறருக்கு இது குறித்த விழிப்புணர்வு மிகவும் குறைவாகவே காணப்படுகிறது.  

இவ்வளவு வேகமாக வளரும் மக்கள்தொகையால் ஏற்படும் விளைவுகள் என்ன? ஏன் மக்கள்தொகை இவ்வளவு வேகமாக வளர்கிறது? இதன்  நன்மைகள் என்ன? தீமைகள் என்ன? நன்மைகளை வளர்த்து தீமைகளைக் களைய என்ன செய்யலாம்? எனது சிந்தனைகள்....

ஏன்? :
ஒரு தம்பதியினர் இரண்டுக்கு மேற்பட்ட குழந்தைகள் பெறுவதும், பிறப்பு விகிதம் அதிகமாகவும் இறப்பு விகிதம் குறைவாகவும் இருப்பதும், மக்களின் வாழ்நாள் அதிகரிப்பதும் காரணிகள்.

படித்த/படிக்காத   விழிப்புணர்வு உள்ளவர்களைவிட விழிப்புணர்வு இல்லாதவர்களாலேயே அதிகம் மக்கள்தொகைப் பெருக்கம் ஏற்படுகிறது. இவ்வளவு மக்கள் தொகை பெருகினால் ஏற்படும் விளைவுகள் பற்றிய அறியாமை.  எனவே மக்கள்தொகை பற்றிய விழிப்புணர்வு ஏற்படுத்தப் படவேண்டும்.

மத சம்பந்தமான நம்பிக்கைகளும் மக்கள்தொகை பெருக்கத்திற்குக் காரணமாக இருக்கிறது. இதற்கும் விழிப்புணர்வுப் பிரச்சாரமும், மத சம்பந்தமான தெளிவு ஊட்டலும் தேவை.

ஆண் குழந்தைகள் மீது இருக்கும் மோகம். ஒரு ஆண் குழந்தைக்காக பல பெண்களைப் பெற்றவர்கள் இன்றும் இருக்கிறார்கள். இதிலும் மோசமாக, சில பிறந்த பெண்குழந்தைகளைக் கொல்லும் கொடுமையும் இங்கு நடந்திருக்கிறது. இவ்வாறு ஆண்குழந்தைகளே பெற்றுக் கொண்டு இருந்தால் உலகத்தின் சமநிலை பாதிக்கப்படும். பெண்களுக்கு எதிரான வன்முறைகளும் எதிர்காலத்தில் அதிகரிக்கும். இதற்கும் சரியான விழிப்புணர்வும், சமூக வழிகாட்டலும் அவசியம்.

வறுமையில் வருமானத்திற்காக அதிகக் குழந்தைகளைப் பெற்றுக்கொள்ளல். இதற்கும் சரியான விழிப்புணர்வும், சமூக வழிகாட்டலும் அவசியம்.


நன்மைகள் :
மக்கள் தொகை அதிகரிப்பால் ஏற்படும் நன்மைகள் என்ன?

முதல் நன்மை அதிகமான மனித சக்தி நம்மிடம் கிடைக்கிறது. ஒரு ஏழைக் குடும்பத்தில் 5 குழந்தைகள் இருந்தால் ஐவர் சம்பாத்தியம் செய்ய வாய்ப்பு கிடைக்கிறது. குடும்பம் சார்ந்த தொழிலில் இருப்பவர்களுக்கு இது மிகவும் வசதியாக இருக்கிறது.

இதை பாதுகாப்புத்துறையிலும் மற்றும் மனித வளம் அதிகம் தேவைப்படுகின்ற துறைகளிலும் உபயோகப்படுத்தலாம்.

அதிக மனிதவளம் உள்ளதால் பல துறைகளில் சிறப்புப் பயிற்சிகள் அளிக்கப்பட்ட சிறந்த மனிதவளத்தை உருவாக்கலாம். தடையற்ற ம்னிதவளம் பல தொழில்கள் சிறக்க தூண்டுகோலாக இருக்கும்.

அதிக மக்கள்தொகை உள்ள இடங்கள் பல பொருட்களுக்கு சிறந்த சந்தை வாய்ப்பை ஏற்படுத்தித் தருகின்றன. குறைந்த செலவில் நிறைய பொருட்கள் தயாரித்து விற்க ஒரு வாய்ப்பு ஏற்படுகிறது.

தீமைகள் / சவால்கள் :

1) மக்கள்தொகைக்குத் தகுந்தவாறு உணவு உற்பத்தியைப் பெருக்குதல். இது ஒரு பெரிய சவாலாக இப்போது ஆகிவிட்டது. விவசாயம் ஒரு வருமானமில்லாத சிறு தொழிலாக ஆகிவிட்டதால் பெரும்பாலான சிறு / குறு விவசாயிகள் விவசாயத்தை விட்டு நகர்ப் புறங்களுக்கு இடம் பெயர ஆரம்பித்ததும், விவசாய நிலங்களை வீட்டுமனைகளாக ஆக்கிவருவதும் முக்கியக் காரணிகள்.

தீர்வு :
விவசாயத்தை மீட்டெடுக்கவும், விளச்சலைப் பெருக்கவும், ஆரோக்கியமான உணவு உற்பத்தி செய்வதை ஊக்குவிக்கவும் உடனடி நடவடிக்கை தேவை. புதிய  பசுமைப் புரட்சி ஏற்பட வேண்டும்.

இது நமக்கு ஒரு நல்ல வாய்ப்பு. நம்மிடம் இருக்கும் வளமான நிலங்களையும், அபரிமிதமான மனித வளத்தையும் வைத்து இதை நாம் மிகவும் சிறப்பாக செய்ய முடியும். செய்தால் உலகிற்கே உணவு அளிக்கும் வகையில் நாம் வளர முடியும்.

இது பற்றிய முந்தய பதிவு :  விவசாயம் முன்னேற.... .


2) அனைவருக்கும் சிறந்த இருப்பிடம் அமைத்தல் :  
தனிவீடுகள் அதிகரித்த்தும், அடுக்குமாடி வீடுகள் குறைவாக இருப்பதுவுமே காரணம். நம்மிடம் இருக்கும் நிலத்தின் ஒவ்வொரு அடியையும் சரியாகப் பயன்படுத்தாததும் முக்கியகாரணம். பெரும்பாலான இடங்களில் சரியான குடிநீர் மற்றும் கழிவுநீரகற்று வசதி சரியாக இல்லை. மானாவாரியாக விவசாய / தரிசு நிலங்களை ஆக்கிரமிப்பு செய்து சிறு சிறு கட்டிடங்கள் கட்டிக்கொண்டே செல்வதும் ஒரு காரணம். இதனால் நகரங்கள் மிகவும் விரிவடைந்து பொதுமக்கள் போக்குவரத்தும் ஒரு பிரச்சினை ஆக ஆகிவிட்டது.

பல தனியார்கள் தேவையில்லாமல் நிலத்தில் முதலீடு என்ற பெயரில் நில ஆக்கிரமிப்பு செய்து பயன்படுத்தாமல் வைத்திருப்பதால், ஒரு பெரிய நில மதிப்பு உயர்விற்குக் காரணமாகவும் ஆகிவிட்டது. சாமானியர்கள் வீடு /  வீடுகட்டநிலம் வாங்க முடியாத நிலையும் ஆகிவிட்டது.

தீர்வு :
நில உச்ச வரம்புச் சட்டம் கடுமையாக அமல்படுத்தப் பட வேண்டும்.  பயன்படுத்தப்படாத நிலங்களுக்கு வரிவிதிக்கப்படவேண்டும். தொடர்ந்து பல ஆண்டுகள் பயன்படாத நிலங்களுக்கு ஒரு விலை கொடுத்து அரசாங்கம் வாங்கிகொள்ள ஏற்பாடு செய்யப்படவேண்டும்.

நகர்ப்புறங்களில் அதிகமான அடுக்குமாடிக் குடியிருப்புகள் கட்டப்படவேண்டும்.   அனைவருக்கும் சிறப்பான குடிநீர் மற்றும் சாக்கடை வசதி செய்து தரப்படவேண்டும்.

இதற்கு ஆட்சியாளர்களுக்கு அதிகம் தேவை " Political Will" . ஓட்டு அரசியலை மறந்து மக்கள் நலனை சிந்தித்து செயல்படும் தலைவர்கள் தேவை.


3) புதிய வேலைவாய்ப்புகள் உருவாக்கல் :
இப்போது இருக்ககூடிய அரசுகள் குறுகிய நோக்கில் செயல்பட்டு வருவதால், பெருகும் மக்கள்தொகைக்கு ஏற்ப புதிய வேலைவாய்ப்புகளை ஏற்படுத்த முடியவில்லை. மனித வளம் அதிகம் தேவையான தொழில்களுக்கு முக்கியத்துவம் கொடுக்காததும் ஒரு முக்கியக் காரணி.

இதனால் மக்கள் கிராமங்களிலிருந்து , சிறு / பெரு நகரங்களுக்கு இடம் பெயரத்தொடங்கினார்கள். இது மேலும் பல சிக்கல்களை ஏற்படுத்திவிட்டது. நகரங்களில் போதுமான வசதிகள் இல்லாத நிலையில் இந்த இடப்பெயர்ச்சியும் சேர்ந்து கொள்ள இது ஒரு இடியாப்பச்சிக்கலாக நீடிக்கிறது.

தீர்வு :
அதிக மனித சக்தி தேவைப்படும் தொழில்களையும், உள்ளூர் வாசிகளை அதிகம் உபயோகப்படுத்தும் தொழில்களையும் ஊக்குவிக்கவேண்டும். NREG போன்று சிறந்த திட்டங்கள் தீட்டப்பட்டு சிறப்பாக  செயல்படுத்தப்படவேண்டும். இவற்றில் ஏற்படும் நடைமுறைச் சிக்கல்கள் உடனடியாகத் தீர்க்கப்பட வேண்டும்.

தொழில் வளர்ச்சி நகரங்களில் மட்டுமல்லாது, கிராமங்களுக்கும் எட்டும்படி செய்ய வேண்டும். இது பற்றிய முந்தய பதிவு : கிராமங்களும்.. நகரமயமாக்கமும்...

4) சிறந்த தொழில் பயிற்சி நிலையங்கள் / கல்விக்கூடங்கள் அமைத்தல். 
மக்கள் தொகைப்பெருக்கத்தை நாம் உபயோகப்படுத்துவதற்கு இவை மிக முக்கியப் பங்கு வகிக்கின்றன. சிறந்த தொழில் நுட்ப வல்லுநர்களை அதிக அளவில் ஏற்படுத்தக் கூடிய சிறந்த தொழில் பயிற்சி நிலையங்கள் / கல்விக்கூடங்கள் அதிக அளவில் இல்லை. இருக்கும் சில சிறந்த கல்விக்கூடங்களில் கற்பவர்களும் பெரும்பாலோனோர் வெளிநாடுகளுக்குச் சென்றுவிடுகிறார்கள்.

நமக்குத் தேவையான அளவில் சிறந்த டாக்டர்களை / எஞ்சினீயர்களை ஏற்படுத்தக் கூடிய கல்விக்கூடங்கள் அறுகியே இருக்கின்றன. சிறந்த டெக்னிசியன்களை ஏற்படுத்தும் சிறப்புப் பயிற்சிக் கூடங்களும் மிகக் குறைவே... இருக்கக் கூடிய சில சிறப்பு கல்வி / பயிற்சி நிலையங்களிலும் கட்டணம் மிக அதிகம்.

தீர்வு :
அதிகமான கல்வி நிறுவனங்கள் ஏற்படுத்தப்பட வேண்டும்.

கல்விக்கட்டணங்கள் முறைப்படுத்தப்பட வேண்டும்.

அனைத்துக் கல்விகளுக்கும் முக்கியத்துவம் வழங்கும் சூழல் ஏற்படவேண்டும்.

அதிகமான சிறந்த ஆசிரியர்கள் உருவாக்கப்படவேண்டும். அவர்களுக்கு சிறந்த வசதி வாய்ப்புகள் ஏற்படுத்தப்படவேண்டும்.

வாழ்க்கைக் கல்வி போதிக்கப்படவேண்டும். படிக்கும்போதே பிற துறைகளில் சிறப்புப் பயிற்சி அளிக்க ஏற்பாடு செய்ய வேண்டும்.

5) தரமான பொருள்கள் கிடைப்பதை உறுதி செய்தல்.மக்கள் தொகை பெருகும்போது, இப்படிப்பட்ட பிரச்சினைகள் எழுவது நிச்சயம். இதற்கு சிறந்த தரக் கட்டுப்பாட்டு விதிகள் அமல்படுத்தப்பட வேண்டும். இதில் தவறு செய்யும் நபர்கள் / அதிகாரிகள் கடுமையாக உடனடியாக தண்டிக்கப்படவேண்டும். உடனடியான கடுமையான தண்டனையே இதற்கு உடனடித் தீர்வு.

6) தரமான மருத்துவ வசதி கிடைப்பதை உறுதி செய்தல்
அதிக  சிறந்த மருத்துவர்கள் உருவாக்கப்பட வேண்டும். அனைத்துப் பகுதிகளுக்கும் பரவலாக மருத்துவ வசதி உறுதி செய்யப்படவேண்டும்.

அதிகப் படியான அரசு மருத்துவமனைகள் ஏற்படுத்தப் பட்டு, சிறப்பாகப் பராமரிக்கப்படவேண்டும். இதுபற்றிய முந்தய பதிவு அரசு மருத்துவமனைகள் - ஒரு தேவை.....

7) குற்றங்கள் அதிகரிப்பதைக் கட்டுப்படுத்துதல்
மக்கள்தொகை பெருகும்போது பெருகும் குற்றங்களைக் கட்டுப்படுத்த சிறப்புப் படைகள் அமைக்கப்படவேண்டும். அதிகப் படியான போலீசார் நியமிக்கப்பட வேண்டும். இருக்கும் போலீஸ் நிலையங்கள் நவீனப் படுத்தப்படவேண்டும்.  போலீசாருக்கு சிறந்த புத்தாக்கப் பயிற்சிகள் வழங்கப்படவேண்டும். இவர்கள்  பொதுமக்களுடன் கலந்து பணியாற்ற சிறப்புப் பயிற்சிகள் ஏற்படுத்தப் படவேண்டும்.

சிறைகளில் கைதிகளுக்கு மனநலப் பயிற்சிகள் வழங்கப் படவேண்டும். திகார் சிறையில் இருப்பதைப் போல கைதிகள் மறுவாழ்வுக்கு சிறப்பு ஏற்படுகள் நாடு முழுவதும் செய்யப்படவேண்டும். குற்றவாளிகள் திருந்தி வாழ வழிவகை செய்யவேண்டும்.


மக்கள்தொகை  குறைய / பெருகுவதைக் குறைக்க என்ன செய்யலாம் ?
இதுபற்றிய விழிப்புணர்வு ஏற்பட சிறந்த பிரச்சாரங்கள் தொடர்ந்து செய்யப்படவேண்டும்.

ஒவ்வொரு தம்பதியும் ஒரு குழந்தை மட்டும் பெற்றுக்கொளவதை ஊக்குவிக்கலாம்.

இரண்டுக்கு மேற்பட்ட குழந்தை இருப்பவர்களுக்கு...

அரசு சலுகைகள் மறுக்கப்படல்
தேர்தலில் போட்டியிடத் தடை
அரசுப் பணியில் சேரத் தடை

இப்படிப்பட்ட தண்டனைகள் தரப்படலாம்.


பரம்பொருளே!! இத்தனை குடைச்சல் தரும் மக்கள்தொகை கட்டுக்குள் வர நீங்கள் தான் ஒரு வழி செய்யவேண்டும். ஓம் நம சிவாய....

ஆன்மீகமும் அரசியலும்....

நமது தேசத்தில் அரசியலும் ஆன்மீகமும் இரண்டறக் கலந்ததாகவே இருந்து வந்திருக்கிறது.. ஒரு அரசியல் இயக்கம் நடத்துவதும் ஒரு ஆன்மீக இயக்கம் நடத்துவதும் கிட்டத்தட்ட ஒன்றுதான். இரண்டிற்கும் ஒரேவிதமான தேவைகள்தான்..ஒரேவிதமான சவால்கள்தான். என்ன அரசியல்வாதிகள் ஆட்சியில் இருந்து சேவை (???) செய்கிறார்கள். ஆன்மீகவாதிகள் சமூகத்தில் கலந்து சேவை (???) செய்கிறார்கள்.

உண்மையான் தேசப்பற்றும், தனிமனித ஒழுக்கமும் கொண்ட ஒரு சில அரசியல்வாதிகளும், ஆன்மீகவாதிகளும் இருந்தால் நாட்டில் மிகப்பெரிய மாற்றத்தைக் கொண்டுவர முடியும்.

ஆனால் இன்று இருக்கக் கூடிய ஆன்மீகவாதிகள் பெரும்பாலும், அரசுக்கு சார்பாகவே அறியப்படுகிறார்கள். எந்த ஆட்சி நடக்கிறதோ அந்த ஆட்சியாளருக்கு சார்பாக (சில நேரங்களில்  பினாமியாக????)  ஆகிவிடுகிறார்கள்.

உண்மையான ஆன்மீகவாதிகளை மறைக்கவே பல போலி ஆன்மீகவாதிகள் உருவாக்கப்படுகிறார்களோ என்ற சந்தேகம் வருகிறது. அதுவும் இப்போது வரிசையாக போலி சாமியார்கள் பிடிபட்டுக்கொண்டு இருக்கும் சூழலில் இது பற்றிய விழிப்புணர்வு அவசியம் என்றே படுகிறது. இது பற்றி எனது சிந்தனைகள்..

இன்று ஒரு ஆன்மீக இயக்கம் ஆரம்பிக்கவும் சிறப்பாக நடத்தவும்,  ஒரு சிறந்த "Public Relation"(PR) - திறமையே அதிகம் தேவை. இயக்கத்தைப் பற்றி நல்ல செய்திகள் அவ்வப்போது பத்திரிக்கைகளில் வரவழைப்பது, அற்புதங்கள் பற்றி பிரச்சாரம் செய்வது, புது அன்பர்களை அதிகம் ஈர்ப்பது,  என்று சில திறமைகள் இருந்தாலே ஒரு ஆன்மீக இயக்கம் நடத்திவிடலாம்.

மக்களிடம் இருக்கக் கூடிய ஒருசமூக அங்கீகாரத்துக்கான ஏக்கத்தை இந்த மாதிரி ஆன்மீக இயக்கங்கள் சரியாகப் பயன்படுத்திக்கொள்கின்றன. ஒவ்வொருவருக்கும் மனதளவில் ஒரு வெற்றிடம் இருக்கவே செய்கிறது. முழுமையான திருப்தி உள்ள மனிதனைக் காண்பது மிகவும் அரிது. அவர்களின் அன்றாடத் தேவைகள் அதிகரிப்பதும், மன அழுத்தங்கள் , புற அழுத்தங்கள் அதிகரிப்பதும் இந்த மாதிரியான ஒரு ஆன்மீகத்தேடலை நோக்கி அவர்களை உந்துகிறது. இல்லை என்றால் அவர்கள் மனநல மற்றும் உடல் நல மருத்துவர்களிடம் செல்கிறார்கள்.

நம் தேவைகளுக்கும், நமக்கு கிடைப்பவைகளுக்கும் உள்ள இடைவெளிதான் நமது மனதிருப்தியின் அளவுகோல். இந்த இடைவெளியை சாதாரணமாக எடுத்துக் கொள்ளும் பக்குவம் இல்லாதவர்கள் மன அழுத்தத்திற்கு ஆட்படுகிறார்கள். அந்த இடைவெளியைக் குறைக்க மனித முயற்சிகளில் ஈடுபடுகிறார்கள்.

இவர்களுக்கு ஓரளவுக்கு மன அமைதி தருவதற்கு, நமது பண்டைய யோகா, தியான, மூச்சுப் பயிற்சி முறைகளை முறையாகக் கற்ற, கற்பிக்கத்தெரிந்த  யாராலும் முடியும். இப்படிக் கற்றுத் தரபவர்கள் குரு ஆகிறார்கள். இந்த குருமார்களை மனிதர்கள் நம்பத்தொடங்குகிறார்கள். இதுவே ஒரு ஆரம்பப் புள்ளி.

இவர்களை மேலும் ஒரு பொதுக் குறிக்கோளை நோக்கி உந்தித் தள்ளி, தனது நோக்கங்களை நிறைவேற்றும் எண்ணம் கொண்டவர்களே போலி சாமியாராக ஆகிறார்கள்.  அதாவது, உலக அமைதி, உன்னத உலகம், பசியற்ற சமூகம், நோயற்ற சமுதாயம் மற்றும் பல..

இது மனித மனதில் உள்ள ஒரு ஹீரோ நோக்கிற்கு தீனிபோட்டு அவர்களை Exploit செய்வது ஆகும். சிறுவயதில் நமக்கு கார்ட்டூன்கள் மேல் அதிக ஆர்வம் ஏற்பட இது ஒரு முக்கிய காரணி. இந்தக் காரணியை பெரியவர்கள் ஆனதும் இப்படிப்பட்ட போலி சாமியார்கள் பயன் படுத்திக்கொள்கிறார்கள்.

இந்தப் போலி சாமியார்களை நமது அரசியல்வாதிகள் பயன் படுத்திக்கொள்கிறார்கள்.

என்ன செய்யலாம் :

யோகா, தியானம், மூச்சுப் பயிற்சி மட்டும் கற்றுக் கொள்ளலாம். அவர்களின் இயக்கங்களுக்குத் தரும் முக்கியத்துவத்தை இவற்றுக்கு அளிக்கலாம்.

இவற்றை முறையாகக் கற்று, இடைவிடாமல் பயிற்சி செய்து வந்தாலே நமக்கு தேவையானவை கிடைத்துவிடும். இயக்கங்கள் சொல்லும் பெரிய நோக்கங்களுக்கு செவி சாய்த்து, நமது நேரத்தையும், பணத்தையும் விரயம் செய்யாமல் இருக்கலாம்.

தேவை இல்லாத வணிகரீதியிலான "Merchandise" களில் இருந்து தள்ளியே இருக்கவேண்டும். சிறப்பு தரிசனம், குருவின் சிறப்பு ஆசி என்று வணிகப் படுத்தப் பட்ட விசயங்களில் கவனமாக இருக்க வேண்டும்.

இந்தக் கலிகாலத்தில் இதை சரியாக செய்து வந்தாலே, தனிமனித ஒழுக்கம், மனக்கட்டுப்பாடு  அதிகரிக்கும். நமக்கு நாமே வழிகாட்டும் திறமை வாய்க்கும்.

மாட்டிக் கொள்ளாதவரை அனைத்து இயக்கங்களுமே உத்தமமானவையே!!!! இவற்றை வேறுபடுத்துவது மிகக் கடினம். நாம்தான் உஷாராக விழிப்புணர்வுடன் நடந்துகொள்ளவேண்டும்.

கடவுளே!! மஹாலிங்கம் !!!!போலிகள்கிட்ட இருந்து எங்கள எல்லாம் காப்பாத்து!!!!! ஓம் நம சிவாய !!! சதுரகிரியாருக்கு அரோகரா!!!!

ஆட்சிகள் மாறினால் காட்சிகள் மாறுமா ?????

ஆட்சிகள் மாறினால் காட்சிகள் மாறுமா ????? அதாவது, இந்த ஊழல், லஞ்சம், கருப்புப் பணம், வறுமை, விலைவாசி மற்றும் பல விசயங்களில் சரியான நடவடிக்கை இருக்குமா??? எனது சிந்தனைகள்...

ஆட்சி மாறும்போது, அதில் பங்குபெறுபவர்கள் மட்டுமே மாறுகிறார்கள்... காட்சிகள் அப்படியேதான் இருக்கும்.... என்ன .. அன்று எதிர்க்கட்சியாக இருந்தவர்கள் இன்று ஆளும் கட்சியாகவும், அன்று ஆளும் கட்சியாக இருந்தவர்கள் இன்று எதிர்கட்சியாகவும் மாறுகிறார்கள்.. மற்றபடி, ஆட்சி நடத்தும் விதம், முன்னாள் ஆளும் கட்சிகள் மீது உள்ள புகார்கள் மேலான நடவடிக்கை எடுப்பதுபோன்ற ஒரு தோற்றம் (உண்மையில் எடுப்பதில்லை), வீர வசனங்கள், சில நாட்கள் தூய ஆட்சிபோல நடந்து கொள்ளுதல் இதுபோன்ற காட்சிகள் தொடர்ந்து நடந்துகொண்டுதான் இருக்கும். சில நாட்கள் ஆட்சிகட்டிலில் இருந்தபின், மீண்டும் அதேபோல ஊழல், லஞ்சம், விலைவாசி போன்ற பிரச்சினைகள் தலைதூக்கும்....

ஏனென்றால் இன்று அரசியல் ஒரு வியாபாரம். பெரும் பணமுதலீடு செய்து பல காலம் காத்திருந்து, ஆட்சி வந்தவுடன் முதலீட்டை எப்படி பல மடங்காக எடுக்கவேண்டும் என்ற தந்திரம் தெரிந்த வியாபாரிகளால் நடத்தப்படும் ஒரு நிறுவனம். இன்று ஒரு கட்சியில் இருப்பவர்கள் நாளை மாற்றுக்கட்சியில் சேர்ந்து கொளகைமுழக்கம் இடுவார்கள். மீண்டும் தாய்க் கட்சிக்குத் திரும்பி கண்ணீர்வடித்து கட்டிக்கொள்வார்கள்.  அதேபொல கூட்டணி என்ற பெயரில் ஒரு நாடகம் நடக்கும். அதில் வில்லன் ஹீரோ வுடனும், ஹீரோயின் காமெடியனுடனும் டூயட் பாடும் அதி அற்புதக் காட்சிகள் அரங்கேறும்.

இவைகளைப் பார்த்து நம் போன்றபாமரர்கள் கைதட்டி ஆரவாரம் செய்து "வாழ்க,  ஒழிக" கோஷங்கள் போடவேண்டும். வெட்கக்கேடு....

இந்த அரசியல் விளையாட்டில் எந்தப் பாகுபாடும் இல்லை. திராவிடக் கட்சிகள் ஆளும் தமிழகமோ, கம்யூனிஸ்ட் ஆளும் மேற்கு வங்கமோ, காங்கிரஸ் ஆளும் ஆந்திரமோ, பாரதீய ஜனதா ஆளும் கர்நாடகமோ எந்த விதமான வேறுபாட்டுடன் இல்லை.

இவ்வளவு ஏன்? ஒரு முறை மாவோயிஸ்ட் டுகள் கூட நேப்பாளத்தில் ஆட்சியைப் பிடித்து அவர்களும் அப்படியே என்று காட்டிக் கொண்டார்கள்.

"இன்றைக்கு உண்மையில் தவறு செய்யாதவர்களில்  பெரும்பான்மையானோர் தவறு செய்ய சந்தர்ப்பம் வாய்க்காதவர்களே"

நேர்மையானவர்கள் கூட இப்படிப்பட்ட சூழலில் மாட்டிக்கொண்டு மாறிவிடுகிறார்கள் அல்லது மாற்றப்பட்டு விடுகிறார்கள். இது பற்றி எனது முந்தய பதிவு : ஏன் இப்படி இருக்கிறார்கள்???

ஏன் இந்த நிலை???

இதற்கு முக்கிய காரணம் தனிமனித ஒழுக்கம் குறைந்தது.

"உள்ளத்தால் உள்ளலும் தீதே பிறன் பொருளை

கள்ளத்தால் கள்வேம் எனல்"

என்று வள்ளுவப் பெருந்தகை அன்றே சொல்லியிருக்கிறார்.

கேவலமான தொலைக்காட்சித் தொடர்கள், மோசமான சினிமாக்கள் இவை மனித மனங்களில் ஏற்படுத்திய தீய எண்ணங்களின் விளைவுகள் இப்போது ஒரு புதிய சந்ததியினரின் "Gene" களைப் பாதித்து, நேர்மையான எண்ணங்களை குலைத்துவருகிறது. ஆம்.. நமது சிந்தனைகளின் ஆற்றல் நமது சந்ததிகளையும் நமது சுற்றுச்சூழலையும் பாதிக்கும்.

தனிமனித ஒழுக்கம் என்பது சீர்கெட முக்கிய காரணிகளாக சினிமாவும், தொலைக்காட்சிகளும் இருக்கின்றன. அதுவும் இவை இப்போது அரசியல் கட்சிகளின் பிரச்சார பீரங்கிகளாகவும் ஆகிவிட்டன.

இவற்றைத் தட்டிக்கேட்கும் பொறுப்பில் ஒருகாலத்தில் இருந்த பத்திரிக்கைகளில் பெரும்பான்மையானவை இப்போது அவற்றில் பங்குதாரராக மாறிவிட்ட சூழல் மிகவும் பரிதாபமானது.

சுதந்தரமாக இருப்பதாக நாம் எண்ணும் இந்த வலைப் பதிவுலகமும் வெகு விரைவில் பத்திரிக்கைகளின் வரிசையில் சேரும். இது காலத்தின் கட்டாயம். இதை ஏன் கூறுகிறேன் என்றால் இப்போது பதிவுலகில் வோட்டுக் காக , ஹிட்டு க்காக பதிவுகள் இடுதல், இவைகளைப் பின்பற்றி பதிவுகளை வரிசைப் படுத்துதல் தொடங்கி இருக்கிறது. இதில் நமது வோட்டுப் பொறுக்கிக் கட்சிகள் (இவர்கள் இதில் மிகவும் தேர்ந்தவர்கள்)  பங்கு கொள்ளும் நாள் வெகுதொலைவில் இல்லை. அவர்கள் செய்யும் ஒரு "Organised" ஆக்கிரமிப்பில் இருந்து பதிவுலகம் தம்மைக் காத்துக் கொள்ள இப்போதே ஆயத்தமாக வேண்டும்.

எனவே நமது அரசியல்முறை மாற்றி அமைக்கப்பட கருத்தாக்கம் செய்யப்பட வேண்டிய நேரம் வந்துவிட்டது என்றே எண்ணுகிறேன். இது பற்றிய எனது சிந்தனைகளின் முந்தய பதிவு : நாடாளுமன்றம் - தேவையா? - நமது தேர்தல் முறை சரியா?

அதனால ஆட்சிகள் மாறினால் காட்சிகள் பெரிதாக மாறும் என்ற நம்பிக்கை இப்பொதைக்கு இல்லை. ஒரு பிரளயம், போர், பெரிய சமூக இடர் இவை மட்டுமே இந்த நிலையை மாற்ற முடியும் னு நினைக்கிறேன்.

கடவுளே!! ஆண்டவா!!!! சதுரகிரி வாழ் பரம்பொருளே!!! எல்லாரையும் காப்பாத்து....சதுரகிரி சுந்தர மஹாலிங்கத்துக்கு.... அரோகரா....

கோவில் கொள்ளைகள்....

சமீபத்தில் ஒரு முறை நான் மதுரை அழகர் கோவிலுக்கு குடும்பத்துடன் சென்றிருந்தேன். எங்களையும் சேர்த்து கோவிலில் ஒரு 7 பேர்தான் தரிசனத்துக்கு வந்திருந்தனர். வெகுநாட்களுக்குப் (சில வருடங்களுக்கு) பிறகு நான் அங்கு சென்றதால், நடைமுறை தெரியவில்லை.

வழக்கமாக செல்லும் பாதை வழியாக தரிசனத்துக்கு சென்றேன். தடுத்து நிறுத்தப்பட்டேன். கோவில் ஊழியர் ஒருவர் "சார் இது கட்டண வழி... இலவச தரிசனம் செய்யணும்னா இங்க முன்னால நின்னே தரிசனம் செஞ்சுட்டு போங்க" என்றார். உடனே நான் அப்பாவியா "இங்க மொத்தமே 7 பேர் தான் இருக்கோம், இதுக்கு எதுக்கு கட்டண முறை.. அதுவும் இங்கிருந்து பார்த்தால் சந்நிதி சரியாக தெரியவில்லை" என்றேன். "அதெல்லாம் எங்களுக்கு தெரியாது. முன்னாடி போய் தரிசனம் வேணும்னா காசு குடுங்க" என்றார். ஒரு நபர்க்கு ரூ 10. நாம் மீண்டும் அவரிடன் வாக்குவாதத்தில் ஈடுபட, அவர் "ஏதாவது பேசணும்னா ஆபீஸ்ல போய் பேசிக்குங்க. எங்கள்ட சொல்றதத்தான் நாங்க செய்றோம்" என்றார்.. கடைசியில் ரூ 10 கொடுத்த பிறகே முன்னே சென்று தரிசனம் செய்ய முடிந்தது.

இதே கதை தான் திருவில்லிபுத்தூர் வட பத்ர சாயி கோவிலிலும். முன்னால் நின்றுபார்த்தால் சுவாமி உருவம் முழுவதும் தெரியாது. சற்று உள்ளே சென்று பார்த்தால் தான் முழுதும் பார்க்க முடியும். இங்கும் இப்போது சுவாமியை முன்னால் சென்று பார்க்க கட்டணமுறை வந்து விட்டது.

திருச்செந்தூர் போன்ற கோவில்களில் நிலைமை இன்னும் மோசம்.

இதுபோல இன்னும் எத்தனை கோவில்களில் இப்பிடி இருக்குன்னு தெரியல. கூட்டம் இருக்கும் காலத்தில் மட்டும் இருந்த கட்டண தரிசன முறை இப்போது சுவாமி தரிசனத்துக்கே கட்டணம் கேட்கும் நிலைக்கு பரிணமித்திருக்கிறது.

என்னைப்போன்றவர்கள் ஆண்டவன் தரிசனத்துக்கே அதிக முக்கியத்துவம் தருவதால், பூசை, அர்ச்சனை கூட அதிகம் செய்வதில்லை. இப்போது அதுக்கும் வேட்டு வைத்துவிட்டார்கள்.

இந்த நிலை ஏன் ஏற்பட்டது? என்ன செய்யலாம்? எனது சிந்தனைகள்....

காரணிகள் :

இந்த நிலைக்கு முதல் காரணமாக சொல்லப்படுவது, கோவில்களுக்கு வருமானத்துக்கு வழி செய்வது.

மேலும், எப்பிடி கட்டணம் கேட்டாலும் குடுத்துத்தானே ஆகணும்ங்கற கோவில் நிர்வாகத்தினரின் திமிர் மனப்பான்மை.

கோவில் சொத்துக்கள் முறையாக பராமரிக்கப்படாமல், அவை சிலரின் சொந்த உபயோகத்துக்காகயும் லாபத்துக்காகவும் மாற்றப்பட்டது.

நமது கோவில்களையோ, பக்தியையோ, பாரம்பரியத்தையோ பற்றி தெரியாதவர்களால் கோவில்கள் நிர்வாகம் செய்யப்படுவது.

இவைபற்றிய அக்கறை உடைவர்களை கோவில் நிர்வாகத்தில் பங்கு கொள்ள அனுமதிக்காதது.

என்ன செய்யலாம் :

கோவில் சொத்துக்கள் கணக்கெடுக்கப்பட்டு முறையாக ஆவணப்படுத்தப் படவேண்டும். அவற்றை ஆக்கிரமிப்பு செய்துள்ளோர்மீது தயவு தாட்சண்யம் இல்லாமல் நடவடிக்கை எடுக்கவேண்டும். முறையாக குத்தகை ஏலம் விடப்பட்டு சிறந்த வருமானம் அந்த சொத்துக்களிலிருந்து வருவதற்கு ஏற்பாடு செய்யப்பட வேண்டும். இது குறிப்பிட்ட கால இடைவெளியில் தொடர்ந்து நடக்க ஏற்பாடு செய்யவேண்டும்.

வருமானம் அதிகம் உள்ள கோவில்களோடு சிறு கோவில்கள் இணைக்கப்பட்டு, அவற்றிற்கும் வருமானத்தில் ஒரு பங்கு தர ஏற்பாடு செய்யப்பட வேண்டும்.

அந்தப் பகுதியில் உள்ள வியாபாரிகள், சமூக நல சங்கங்கள் சேர்ந்து  நலிந்த பாரம்பரிய கோவில்களுக்கு நிதி உதவிக்கான ஏற்பாடுகள் செய்ய வேண்டும்.

உண்மையிலேயே பக்தியும், கடவுள் நம்பிக்கையும், பிறமனிதர் மீது மரியாதையும் தெரிந்தவர்கள்தான் திருக்கோவில் நிர்வாகத்தில் அனுமதிக்கப்படவேண்டும். அந்தந்தப் பகுதியில் உள்ள ஆர்வமுள்ளவர்களும் நிர்வாகத்தில் பங்குபெற அனுமதிக்கவேண்டும்.


இதெல்லாம் செய்வதற்கு முதலில் நல்ல மனம் அரசுக்கு வர வேண்டும். என்ன செய்வது, நமது இந்து மதக் கோவில்களை (அதுவும் வருமானம் வர வழி உள்ள கோவில்களை) மட்டும் அரசு உடைமையாக்கி பாரபட்சம் காட்டும் சூழலில், இந்த எதிர்பார்ப்பு கொஞ்சம் ஓவர்தான்..

மஹாலிங்கம்... நீங்கதான் மனசு வச்சு இந்தக் குறைகளைத் தீர்த்து வைய்யுங்க... ஓம் நம சிவாய...சதுரகிரியாரே சரணம்....

ஏன் இப்படி இருக்கிறார்கள்???

இன்று அரசின் ஒவ்வொரு துறையிலும், லஞ்சம், ஊழல் என்று தினமும் பத்திரிக்கை செய்தி வருகிறது.  இன்று இருக்கும் அரசு அதிகாரிகளும், அரசியல்வாதிகளும் ஏன் இப்பிடி இருக்கிறார்கள் என்று யோசித்துப் பார்த்ததன் விளைவுதான் இந்தப்பதிவு.

1) தாமதமும் ஒரு சலிப்படைந்த தன்மையும் : முதலில், நமது அரசின் செயல்பாடுகள் வெளிப்படைத்தன்மைக்காக ஒரு சில ஏற்பாடுகள் செய்யப்பட்டுள்ளது. ஒரு சிறு பொருள் வாங்குவதற்குக்கூட டெண்டர்விட்டு, கமிட்டி போட்டு, ஒரு பெரிய சடங்குபோல பல படிகள் கடந்துதான் வாங்க முடியும். இதற்கு சில நாட்களில் இருந்து சில மாதங்கள் வரை ஆகிறது. சில நேரங்களில் அதற்குள் அந்தப் பொருளுக்கான தேவையே இல்லாமல் போய்விடும்.  இதனால் ஒரு சில சின்னத்தேவைகளைக் கூட உடனடியாக நிறைவேற்ற முடியாததால் ஒரு வித சலிப்பு ஏற்பட்டுவிடுகிறது. இது எந்த மனிதனுக்கும் ஏற்படக்கூடியதே... இவர்களுக்கு ஏற்பட்டதில் ஆச்சரியம் இல்லை.

யோசித்துப் பார்த்தால் மக்களுக்கு ஏதாவது செய்யவேண்டும் என்று உண்மையாக நினைத்து பதவிக்கு வருபவர்கள் உணரும் முதல் தடை இது.

தீர்வு : அரசுப் பதவிக்கு வருபவர்கள் அனைவருக்கும் சிறந்த மனப் பயிற்சிகள் வழங்கப்படவேண்டும். முடிந்தால் முதல் சில ஆண்டுகளுக்கு, சில நேர்மையான அதிகாரிகள் / அமைச்சர்களை  "Mentor"  ஆகக் கொண்டு,  வழிகாட்டல், பயிற்சிகள் வழங்கப்படவேண்டும். இந்த சலிப்பு ஏற்படாமல் இருந்தாலே நேர்மையான அதிகாரிகளும், அரசியல்வாதிகளும் நிச்சயம் உருவாவர்கள். (ஆனால் சில தவறான அதிகாரிகளும், அரசியல்வாதிகளும், இப்படிப்பட்ட, "Mentor" பணி செய்ய நேரிட்டால், விளைவுகள் பயங்கரமாக இருக்கும்... அதை இப்போது பார்த்தும் வருகிறோம்)

 

2) பாரம்பரியம் : எந்த ஒரு வேலை செய்யவும் ஒரு முன்னுதாரணத்தை எதிர்பார்த்தல். இதற்கு முன்பு இதுபோல செய்திருக்கிறார்களா? எப்பிடி செய்தார்கள்? ஒருவேளை அவ்வாறான ஒரு முன்னுதாரணம் இல்லாவிட்டால் முடிந்தது கதை... அந்த வேலை நடைபெறுவதற்கான சாத்தியங்கள் மிகக் குறைவு. ஒருவேளை நடந்திருந்தால் இதற்குமுன் எப்படி செய்யப்பட்டதோ அதை அடிஒற்றியே செய்யப்படும். அது எவ்வளவு மோசமான பின்விளைவுகள் உள்ளதாக இருந்தாலும்.

தீர்வு :  முன்னுதாரணம் இல்லாத காரியங்களுக்கான வழிகாட்டுதல்கள் சரியான முறையில் பின்பற்றப்பட்டு வேலைகள் பாகுபாடு காட்டாமல் முடிக்கப்பட வேண்டும். ஒவ்வொரு அரசு வேலைகளுக்கும் சரியான "Target" நேரங்கள் ஏற்படுத்தப்பட்டு செயல்படுத்தப்பட வேண்டும். இது முறையாக கண்காணிக்கப்பட வேண்டும். அதிகாரிகளும் / அமைச்சர்களும் நேர்மையான முறையில் பணி செய்யவேண்டும்.

 

3) பயம் : சில பல அரசு ஊழியர், அமைச்சர்களின் கைங்கரியத்தினால், உண்மையிலேயே நல்லன செய்யும் நபர்கள் மிக மோசமாகப் பாதிக்கப்படுகிறார்கள். தவறு செய்பவர்களைத் தடுப்பதற்காக ஏற்படுத்தப்படும் புதிய நடைமுறைகள் உண்மையில் தவறு செய்யாதவர்களை மாட்டுவிக்கவும், பயமுறுத்தவும் அதிகம் பயன்படுகிறது. இதனால் பல நேர்மையான அதிகாரிகளும் அமைச்சர்களும் வலுவான முடிவெடுக்க முடியாமல் திணறுகிறார்கள்.

தீர்வு : தவறுகள் நடக்கும்பொழுது புதிய நடைமுறைகள் ஏற்படுத்துவதற்குப் பதிலாக, இருக்கும் நடைமுறைகள் சரியாக கடைப்பிடிக்கப்படவும், அதை கடைபிடிக்காதவர்களுக்கு கடுமையான தண்டனை உடனடியாக வழங்கவும் ஏற்பாடு செய்யவேண்டும்.  இவ்வாறு செய்தாலே தவறு செய்பவர்கள் எண்ணிக்கை குறைய வாய்ப்பு உள்ளது. தவறு செய்தால் தண்டனை கிடைக்க பல ஆண்டுகள் ஆவதும் இவ்வாறு தவறு செய்பவர்கள் திருந்தாதற்கு முக்கிய காரணம்.

4)  கட்சிகள், பலம் மிகுந்தவர்களின் தலையீடு : நேர்மையாக பணியை ஆரம்பிக்கும்போது, இப்படிப்பட்ட தலையீடுகள் உற்சாகத்தைக் குறைத்து, முனைமழுங்கச்செய்துவிடுகின்றன.

தீர்வு :  தலையீடுகள் ஏற்படும்பொழுது கடைப்பிடிக்க ஒரு நடைமுறை ஏற்படுத்தப்பட்டு "Record" செய்யப்படவேண்டும்.(இது ஏற்கனவே இருக்கிறது என்று நினைக்கிறேன்.. ஆனால் "Unofficial" ஆக).   அதில் தலையிடும் சம்பந்தப்பட்ட அனைவரின் பெயரோடு ஒரு "Report" தயார் செய்யப்பட்டு, சம்பந்தப்பட்ட துறையின் "Notice Board" மற்றும் பத்திரிக்கைகளுக்கு அளிக்கப்பட வேண்டும். அந்தத் தலையீடு சரியானதாக இருக்கும் பட்சத்தில் அதை ஏற்றுக் கொள்ளவும், தவறாக இருக்கும் பட்சத்தில் நிராகரிக்கவும் அதிகாரிகள் தைரியம் கொள்ளவேண்டும்.

5) பேராசையும் ஆதிக்கமனப்பான்மையும் : "உண்மையில், தவறு செய்யாதவர்களில் பெரும்பாலோனோர், தவறு செய்ய சந்தர்ப்பம் வாய்க்காதவர்களே...." இது நான் எங்கோ கேட்ட பொதுமொழி. உண்மையில் ஒருவருக்கு அப்படிப்பட்ட பதவி கொடுக்கப்படும்பொழுது இயல்பாக ஏற்படும் ஆதிக்கமனப்பான்மை, கண்முன் நடைபெறும் சில  தவறான நிகழ்வுகள், பெரும்பான்மை நபர்களை தங்களின் இயல்பான நிலையிலிருந்து பிறழவைத்துவிடுகிறது. பதவிக்கு வரும் முன்பாக நேர்மையும் சிறந்த கொள்கையும் கனவும் கொண்டிருப்பவர்கள் பதவிக்கு வந்த பின் மாறிவிடுவதற்கு இது  ஒரு முக்கியமான காரணி. என்னதான் சிலகாலம் தங்கள் கொள்கையில் பிடிப்பாக இருந்தாலும், காலப்போக்கில் மேற்கண்ட பல் வேறு காரணிகளுடன் கூட்டு சேர்ந்து இந்த நிகழ்வு ஏற்படக்காரணமாகிறது.

தீர்வு : இந்தக் காரணிக்கான நிரந்தரத் தீர்வு நமது "Gene" லயும், வளர்ப்புலயும், கல்விமுறையிலும் தான் இருக்கு. நாம எல்லாரும் எப்போதும் நேர்மையாக இருக்க சங்கல்பம் செய்துகொள்ளவேண்டும். இது நம்முடய சந்ததிக்கு நிச்சயம் செல்லும். நமது குழந்தைகளை வளர்க்கும்போது இதை அழுத்தமாக சொல்லி வளர்க்க வேண்டும். கல்விக்கூடங்கள், இதில் பெரும் பங்கு ஆற்ற முடியும். தனிமனித ஒழுக்கமும், நேர்மையும் சில தலைமுறைகள் தொடரும்பொழுதே இந்தக் காரணி மாறமுடியும். பெரிய தண்டனைகளை வழங்குவதன் மூலம் ஒரு பயத்தை உண்டுபண்ணியும் இதை தற்காலிகமாக நிறுத்தலாம். ஆனால் நிரந்தரத்தீர்வு எதிர்காலத்தில் மட்டுமே.

இவ்வளவுக்கும் நடுவுல (மாட்டிக்காம) வேலை செய்யுற நமது அரசு அதிகாரிகளும் அரசியல்வாதிகளும் உண்மைலேயே ரொம்ப திறமைசாலிகள்தான். ஆனா இந்தத் திறமைய இவங்க நேர்மையான விசயங்களுக்கு அதிகமாப் பயன்படுத்தினா நாடு நல்லா இருக்கும்.

இந்த நிலைமைலயும் இவ்வளவு தாமதமாவும் இவ்வளவாச்சும் நலப் பணிகள் நடக்குதேன்னு சந்தோசப்பட்டுக்கவேண்டியதுதான்.

ஓம் நம சிவாய ..... சதுரகிரியாரே இந்த நாட்டக் காப்பாத்து....